ఎంఏఓ సైదులు యాదవ్ ఆదేశాలతో క్షేత్రస్థాయిలో పర్యటించిన ఏఈఓ సురేష్ కుమార్
ఎల్‌నినో ప్రభావాలపై రైతులకు అవగాహన.. పంటల సంరక్షణకు పలు సూచనలు
పొలిటికల్ పవర్ సమగ్ర జాతీయ తెలుగు దీనపత్రిక / పిఎన్9 టీవీ తెలుగు న్యూస్ వనపర్తి జిల్లా బ్యూరో నవంబర్ 12 2026: పెద్దమందడి మండలం అల్వాల గ్రామ పరిధిలో ఇటీవల పంట నష్టం జరిగిన రైతుల పొలాలను మండల వ్యవసాయ అధికారి (ఎంఏఓ) సైదులు యాదవ్ ఆదేశాల మేరకు ఏఈఓ సురేష్ కుమార్ బుధ, గురువారాల్లో క్షేత్రస్థాయిలో పరిశీలించారు. రెండు రోజుల పాటు గ్రామంలో పర్యటించి సుమారు 30 మంది రైతులకు చెందిన పంటలను పరిశీలించినట్లు తెలిపారు. ఈ సందర్భంగా రైతుల పొలాలను సందర్శించి పంటల పరిస్థితిని పరిశీలించడంతో పాటు, వర్షాలు మరియు ఇతర వాతావరణ పరిస్థితుల కారణంగా పంటలకు జరిగిన నష్టాన్ని అంచనా వేసి వివరాలను నమోదు చేశారు. పంట నష్టం వివరాలను సంబంధిత అధికారులకు నివేదించనున్నట్లు తెలిపారు. అలాగే ఎల్‌నినో ప్రభావంతో వర్షపాతం తగ్గడం, వర్షాల విరామం పెరగడం వంటి వాతావరణ మార్పులు వ్యవసాయంపై ప్రభావం చూపే అవకాశం ఉన్నందున రైతులు అప్రమత్తంగా ఉండాలని సూచించారు. అందుబాటులో ఉన్న నీటిని పొదుపుగా వినియోగించుకోవాలని, నేలలో తేమను కాపాడుకునే పద్ధతులు పాటించాలని, వాతావరణ పరిస్థితులను గమనిస్తూ వ్యవసాయ పనులు చేపట్టాలని సూచించారు. పంటల్లో తెగుళ్లు, చీడపీడలు కనిపించిన వెంటనే వ్యవసాయ అధికారులను సంప్రదించి తగిన సలహాలు తీసుకోవాలని రైతులకు సూచించారు. వాతావరణ పరిస్థితులకు అనుగుణంగా వ్యవసాయ శాఖ సూచనలు పాటిస్తూ పంటలను సంరక్షించుకోవాలని ఏఈఓ సురేష్ కుమార్ రైతులకు అవగాహన కల్పించారు.