అవసరానికి రుణమంటూ నమ్మించి.. ఆపై డబ్బుల కోసం వేధింపులు
బిక్కవోలు: తూర్పుగోదావరి జిల్లా బిక్కవోలు మండలం పందలపాకలో లోన్ యాప్ సైబర్ నేరగాళ్ల వేధింపులు కలకలం రేపుతున్నాయి. అవసరానికి రుణం ఇస్తామంటూ నమ్మించి.. రుణం తీసుకున్న అనంతరం వివిధ రకాల పేర్లతో అదనంగా డబ్బులు చెల్లించాలంటూ రాత్రింబవళ్లు ఫోన్ కాల్స్, మెసేజ్లతో వేధిస్తున్నారని గ్రామానికి చెందిన మహబూబ్ బాషా దంపతులు ఆవేదన వ్యక్తం చేస్తున్నారు.
తమకు అవసరం ఉండటంతో లోన్ యాప్ ద్వారా డబ్బులు తీసుకున్నామని, అయితే ఆ తర్వాత మరిన్ని డబ్బులు చెల్లించాలంటూ సైబర్ నేరగాళ్లు ఒత్తిడి చేస్తున్నారని బాధితులు చెబుతున్నారు. డబ్బులు చెల్లించకపోతే వివిధ రకాలుగా బెదిరింపులకు పాల్పడుతున్నారని వాపోతున్నారు.
లోన్ ఇస్తామంటూ ఆశ చూపించి.. ఆ తర్వాత వేధింపులకు గురిచేయడం ఎంతవరకు సమంజసమని బాధితులు ప్రశ్నిస్తున్నారు.
సైబర్ నేరాలపై ప్రభుత్వం, పోలీసులు ఎప్పటికప్పుడు ప్రజలకు అవగాహన కల్పిస్తున్నప్పటికీ.. సైబర్ నేరగాళ్ల మోసాలకు మాత్రం పూర్తిస్థాయిలో అడ్డుకట్ట పడటం లేదనే ఆందోళన వ్యక్తమవుతోంది.
తమకు ఎదురైన వేధింపులపై న్యాయం చేయాలని కోరుతూ మహబూబ్ బాషా దంపతులు పోలీసులను ఆశ్రయించారు. ఘటనపై పోలీసులు విచారణ చేపట్టి, లోన్ యాప్ వెనుక ఉన్న సైబర్ నేరగాళ్లను గుర్తించి చర్యలు తీసుకోవాలని బాధితులు కోరుతున్నారు.
లోన్ యాప్ల విషయంలో ప్రజలు అత్యంత అప్రమత్తంగా ఉండాలని పోలీసులు సూచిస్తున్నారు. తెలియని యాప్లను డౌన్లోడ్ చేయవద్దని, అనుమానాస్పద లింకులను క్లిక్ చేయవద్దని, గుర్తుతెలియని వ్యక్తుల ఫోన్ కాల్స్ను నమ్మవద్దని హెచ్చరిస్తున్నారు. ముఖ్యంగా రుణం పేరుతో వ్యక్తిగత వివరాలు, బ్యాంకు సమాచారం, ఓటీపీ వంటి సున్నితమైన సమాచారాన్ని ఎవరికీ ఇవ్వవద్దని సూచిస్తున్నారు.