ముంపు ప్రాంతాలను పరిశీలించిన మాజీ ఎమ్మెల్యే సత్తి సూర్యనారాయణ రెడ్డి – రైతులను ఆదుకోవాలని డిమాండ్
బిక్కవోలు సెప్టెంబర్ 25:
వాయుగుండం ప్రభావంతో కురిసిన భారీ వర్షాలకు బిక్కవోలు మండలం బలభద్రపురం గ్రామంలో పలు ప్రాంతాలు జలమయమయ్యాయి. ముఖ్యంగా ఊర చెరువు పరిసరాల్లోని వందల ఎకరాల వరి పంటలు నీట మునగడంతో రైతులు తీవ్రంగా నష్టపోయారు.
ముంపు పరిస్థితులను పరిశీలించేందుకు అనపర్తి నియోజకవర్గ వైఎస్సార్సీపీ సమన్వయకర్త, మాజీ ఎమ్మెల్యే డాక్టర్ సత్తి సూర్యనారాయణ రెడ్డి బలభద్రపురంలో పర్యటించారు. స్థానిక నాయకులతో కలిసి ముంపునకు గురైన వీధులు, వ్యవసాయ భూములను పరిశీలించారు. మాజీ సర్పంచ్ మల్లిడి అబ్బాయిరెడ్డి వీధిలో నిలిచిన మురుగునీటిని పరిశీలించి, నీరు బయటకు వెళ్లకపోవడానికి గల కారణాలను స్థానికులను అడిగి తెలుసుకున్నారు.
అదేవిధంగా కొత్త చెరువు సమీపంలో సుమారు 25 ఎకరాల్లో నీట మునిగిన వరి పొలాలను పరిశీలించారు. గత వేసవిలో చెరువు గట్టును ఎత్తుగా నిర్మించడం వల్ల వర్షపు నీరు సక్రమంగా చెరువులోకి వెళ్లే మార్గం దెబ్బతిన్నదని రైతులు ఆయన దృష్టికి తీసుకువచ్చారు. దీంతో వర్షపు నీరు పొలాలు, నివాస ప్రాంతాల వైపు చేరుతోందని తెలిపారు.
ఈ సందర్భంగా సత్తి సూర్యనారాయణ రెడ్డి మాట్లాడుతూ.. సరైన ప్రణాళిక లేకుండా చేపట్టిన పనుల కారణంగా రైతులు, గ్రామ ప్రజలు ఇబ్బందులు ఎదుర్కొంటున్నారని అన్నారు. గతంలో ఎన్నడూ లేని విధంగా పంట పొలాలు ముంపునకు గురికావడం ఆందోళనకరమన్నారు. సమస్యకు శాశ్వత పరిష్కారం చూపడంతో పాటు, తుపాను ప్రభావంతో పంటలు నష్టపోయిన రైతులను ప్రభుత్వం వెంటనే ఆదుకోవాలని డిమాండ్ చేశారు. పంట నష్టాన్ని అధికారులు క్షేత్రస్థాయిలో పరిశీలించి అర్హులైన రైతులకు నష్టపరిహారం అందించాలని కోరారు.
ఈ పర్యటనలో గ్రామ శాఖ అధ్యక్షుడు కొవ్వూరి వెంకట రామారెడ్డి, మండల పరిషత్ ప్రాదేశిక సభ్యులు సబ్బెళ్ల సుజాత వీరరాఘవరెడ్డి, మేడపాటి ఆనందరెడ్డి, నాయకులు నల్లమిల్లి బుల్లి రాజా వెంకటరెడ్డి, నల్లమిల్లి పుల్లారెడ్డి, గొర్రెపూడి శ్రీను, గొర్రెపూడి వెంకన్నబాబు, గుబ్బల లాజర్ బాబు, బొడ్డు శ్రీనివాసరావు, గొర్రెపూడి త్రిమూర్తులు తదితరులు, స్థానిక రైతులు పాల్గొన్నారు.