బిక్కవోలు: బిక్కవోలు పోలీస్ స్టేషన్ పరిధిలో అక్రమంగా బాణసంచా తయారు చేస్తున్నారన్న సమాచారంతో పోలీసులు దాడులు నిర్వహించారు. కొమరిపాలెం గ్రామ శివారులోని చేపల చెరువుల వద్ద అక్రమ బాణసంచా తయారీ జరుగుతున్నట్లు పోలీసులకు విశ్వసనీయ సమాచారం అందింది.
సమాచారం మేరకు బిక్కవోలు పోలీసులు తనిఖీలు చేపట్టి, అక్కడ అక్రమంగా బాణసంచా తయారు చేస్తున్నట్లు ఆరోపణలు ఎదుర్కొంటున్న గుబ్బల వీరన్నను అదుపులోకి తీసుకున్నారు.
పోలీసుల తనిఖీల్లో భారీగా బాణసంచా తయారీ సామగ్రి పట్టుబడింది. సుమారు 2.660 కిలోల దీపావళి ఔన్సులు, సుమారు 19.5 కిలోల బరువున్న తార జువ్వలు, 200 ఖాళీ తార జువ్వ గుల్లాలు, 3 ఇనుప అవ్వాయి ప్రెస్సింగ్ యంత్రాలను పోలీసులు స్వాధీనం చేసుకున్నారు.
నిబంధనలకు విరుద్ధంగా పేలుడు పదార్థాలను అక్రమంగా కలిగి ఉండటం, తయారు చేస్తున్నారనే ఆరోపణలపై బిక్కవోలు పోలీసులు కేసు నమోదు చేశారు.
ఈ ఘటనపై క్రైమ్ నంబర్ 152/2026గా కేసు నమోదు చేసి, భారతీయ న్యాయ సంహితలోని సెక్షన్ 288, అలాగే పేలుడు పదార్థాల చట్టం, 1884లోని సెక్షన్ 9(బి)(1)(బి) కింద కేసు నమోదు చేసినట్లు పోలీసులు తెలిపారు.
స్వాధీనం చేసుకున్న బాణసంచా సామగ్రి, తయారీకి ఉపయోగించిన యంత్రాలపై పోలీసులు విచారణ చేపట్టారు. ఈ కేసులో మరిన్ని వివరాలు వెలుగులోకి వచ్చే అవకాశం ఉందని, తదుపరి దర్యాప్తు కొనసాగుతోందని బిక్కవోలు పోలీసులు తెలిపారు.
