వర్షంలోనూ భూముల వద్దకు వెళ్లి ఆధారాలు చూపించిన దళితులు..
హక్కులు నిర్ధారించి న్యాయం చేయాలని విజ్ఞప్తి
పొలిటికల్ పవర్,దమ్మపేట, సెప్టెంబర్23: మండలంలోని ముష్టిబండ గ్రామంలో ఇనాం భూములకు సంబంధించిన వివాదంపై దమ్మపేట రెవెన్యూ యంత్రాంగం క్షేత్రస్థాయిలో పరిశీలన చేపట్టింది. గత కొంతకాలంగా తమ భూముల హక్కుల కోసం పోరాడుతున్న ముష్టిబండ దళితుల విజ్ఞప్తి మేరకు దమ్మపేట తహసీల్దార్ కార్యాలయం నుంచి మండల రెవెన్యూ ఇన్స్పెక్టర్ బిక్షం, జీపీఓ సూరయ్య తదితరులు గ్రామానికి చేరుకుని భూములను పరిశీలించారు.
ముష్టిబండకు చెందిన దళిత కుటుంబాలు తమకు సంబంధించిన ఇనాం భూములపై హక్కులను పునరుద్ధరించాలని గత కొంతకాలంగా అధికారులను కోరుతున్నారు. తమ పూర్వీకుల నుంచి సాగులో ఉన్న భూములు తమ ఆధీనంలో లేకుండా పోయాయని, భూములకు సంబంధించిన రికార్డులు, ఇతర ఆధారాలను పరిశీలించి తమకు న్యాయం చేయాలని వారు డిమాండ్ చేస్తున్నారు.
ఈ అంశంపై దళితులు రాష్ట్ర ఎస్సీ, ఎస్టీ కమిషన్ చైర్మన్ వెంకటయ్యను కలిసి కొత్తగూడెంలో వినతిపత్రం సమర్పించినట్లు తెలిపారు. తమ భూములు ఇతరుల ఆధీనంలోకి వెళ్లాయని, కొన్ని భూములకు పట్టాదారు పాస్బుక్కులు జారీ చేసి ఆన్లైన్లో నమోదు చేసినట్లు ఆరోపిస్తూ, సంబంధిత రికార్డులను సమగ్రంగా పరిశీలించి వాస్తవ హక్కుదారులను గుర్తించాలని కోరారు.
వర్షంలోనూ భూముల వద్దకు వెళ్లి ఆధారాలు
రెవెన్యూ అధికారులు క్షేత్రస్థాయి పరిశీలనకు వచ్చిన సందర్భంగా దళితులు జోరువర్షాన్ని సైతం లెక్కచేయకుండా అధికారులతో కలిసి భూముల వద్దకు వెళ్లారు. తమ వద్ద ఉన్న పాత పత్రాలు, సాగుకు సంబంధించిన ఆధారాలు, భూముల వివరాలను అధికారులకు చూపిస్తూ తమ సమస్యను వివరించారు.
భూముల హద్దులు, రెవెన్యూ రికార్డులు, పట్టాదారు పాస్బుక్కులు, ఆన్లైన్లో నమోదైన వివరాలను సమగ్రంగా పరిశీలించి వాస్తవ పరిస్థితిని తేల్చాలని వారు అధికారులను కోరారు.
రికార్డులు పరిశీలించి న్యాయం చేయాలి
ఇనాం భూములకు సంబంధించిన హక్కులు, పట్టా వివరాలు, పాత రెవెన్యూ రికార్డులు, ప్రస్తుత రికార్డుల్లో నమోదైన వివరాలను అధికారులు క్షుణ్ణంగా పరిశీలించి చట్ట ప్రకారం తగిన నిర్ణయం తీసుకోవాలని బాధితులు కోరుతున్నారు. రికార్డుల్లో ఏవైనా అక్రమ మార్పులు, తప్పుదోవ పట్టించే నమోదులు ఉన్నట్లు తేలితే సంబంధిత నిబంధనల ప్రకారం చర్యలు తీసుకోవాలని విజ్ఞప్తి చేశారు.
భూమి హక్కుల విషయంలో ఎవరి వాదన సరైనదో సంబంధిత రెవెన్యూ రికార్డులు, చట్టబద్ధమైన పత్రాలు, క్షేత్రస్థాయి పరిశీలన ఆధారంగా నిర్ణయించాలని దళితులు కోరుతున్నారు. తమకు న్యాయం జరిగే వరకు పోరాటాన్ని కొనసాగిస్తామని వారు తెలిపారు.
ఈ కార్యక్రమంలో భూ హక్కుల కోసం పోరాడుతున్న కోలికపోక కాంతారాజు, దాట్ల మధు, కోలికపోక ధర్మరాజు, కొలిగిపోకు జగపతిరావు, మల్లాది వెంగళరావు, నారపోగా అనిల్కుమార్, దాట్ల కిషోర్ తదితరులు పాల్గొన్నారు.