సర్వే నంబర్ 423లో దొంగ రికార్డులు సృష్టించి ఆక్రమణలకు పాల్పడిన వారిపై సమగ్ర విచారణ జరపాలి
సిపిఐ మండల కార్యదర్శి పెద్దుల్లపల్లి ప్రభాకర్ డిమాండ్
పొలిటికల్ పవర్ సమగ్ర జాతీయ తెలుగు దినపత్రిక పిఎన్ 9టీవీ తెలుగు న్యూస్ వైఎస్సార్ కడప జిల్లా బ్యూరో ఎం వెంకటేష్
బ్రహ్మంగారిమఠం: నాగిశెట్టిపల్లె రెవెన్యూ పరిధిలోని ప్రభుత్వ భూములు, పంట కాలువలు మరియు ప్రజా ప్రయోజనానికి సంబంధించిన భూములను పరిరక్షించడంలో రెవెన్యూ అధికారులు కఠిన చర్యలు తీసుకోవాలని సిపిఐ మండల కార్యదర్శి పెద్దుల్లపల్లి ప్రభాకర్ డిమాండ్ చేశారు.
నాగిశెట్టిపల్లె రెవెన్యూ పరిధిలోని సర్వే నంబర్ 560లో ఉన్న పంట కాలువను కొందరు వ్యక్తులు ఎలాంటి అనుమతులు లేకుండా పూడ్చివేసి, చదును చేసినట్లు వస్తున్న ఆరోపణలపై అధికారులు తక్షణమే స్థల పరిశీలన నిర్వహించాలని ఆయన కోరారు. పంట కాలువలు రైతుల సాగునీటి అవసరాలకు అత్యంత కీలకమైనవని, వాటిని పూడ్చివేయడం వల్ల వర్షాకాలంలో నీటి ప్రవాహానికి ఆటంకం ఏర్పడి పంట పొలాలకు నష్టం వాటిల్లే అవకాశం ఉందన్నారు.
ప్రభుత్వ రికార్డుల్లో కాలువగా నమోదై ఉన్న భూమిని వ్యక్తిగత అవసరాల కోసం పూడ్చివేసి చదును చేసి ఉంటే, అది నిబంధనలకు విరుద్ధమా కాదా అనే విషయాన్ని అధికారులు రికార్డులు, రెవెన్యూ మ్యాపులు, ఫీల్డ్ మెజర్మెంట్ ఆధారంగా నిర్ధారించాలని కోరారు. నిబంధనలు ఉల్లంఘించినట్లు నిర్ధారణ అయితే బాధ్యులపై చట్టపరమైన చర్యలు తీసుకోవడంతో పాటు, అవసరమైతే క్రిమినల్ కేసు నమోదు చేసి, పూడ్చివేసిన కాలువను తిరిగి పునరుద్ధరించాలని డిమాండ్ చేశారు.
అదేవిధంగా సర్వే నంబర్ 423కు సంబంధించి తప్పుడు లేదా అక్రమ రికార్డులు సృష్టించి భూమిని ఆక్రమించుకున్నారనే ఆరోపణలపై సమగ్ర దర్యాప్తు జరపాలని ప్రభాకర్ కోరారు. ఈ భూమికి సంబంధించిన పాత రెవెన్యూ రికార్డులు, అడంగల్, 1-బి, రీసర్వే రికార్డులు, ఎఫ్ఎంబీ, పట్టాదారు పాస్బుక్ వివరాలు, రిజిస్ట్రేషన్ పత్రాలు తదితరాలను పరిశీలించి అసలు హక్కుదారులు ఎవరు, భూమి స్వభావం ఏమిటి, రికార్డుల్లో మార్పులు ఎప్పుడు జరిగాయి అనే అంశాలను స్పష్టంగా తేల్చాలని అన్నారు.
భూ రికార్డుల్లో అక్రమ మార్పులు జరిగి ఉంటే వాటికి బాధ్యులైన వ్యక్తులతో పాటు, అక్రమంగా రికార్డులు సృష్టించడంలో ఎవరైనా అధికారుల ప్రమేయం ఉందా అనే అంశాన్ని కూడా విచారించాలని డిమాండ్ చేశారు. నకిలీ పత్రాలు లేదా తప్పుడు రికార్డుల ఆధారంగా భూమిని ఆక్రమించారని సంబంధిత వ్యక్తులపై చట్టప్రకారం క్రిమినల్ చర్యలు తీసుకోవాలని అన్నారు.
ఈ వ్యవహారంపై తహసీల్దార్ వెంటనే స్పందించి ప్రత్యేక బృందంతో స్థల పరిశీలన చేయాలి. సర్వే నంబర్లు 560, 423కు సంబంధించిన పూర్తి రెవెన్యూ రికార్డులను పరిశీలించి ఎలాంటి రాజకీయ ఒత్తిళ్లకు తలొగ్గకుండా చట్టపరమైన చర్యలు తీసుకోవాలని అయన డిమాండ్ చేసారు.ఈ కార్యక్రమంలో నాయకులు గుడిమె సురేష్, సుజన్ లు పాల్గొన్నారు.