జై వాల్మీకి, జై శ్రీరామ్ నినాదాలతో బైక్ ర్యాలీ
పొలిటికల్ పవర్ సమగ్ర జాతీయ తెలుగు దీనపత్రిక /పీఎన్9 టీవీ తెలుగు న్యూస్ వనపర్తి జిల్లా బ్యూరో అక్టోబర్ 26 2026: మదనాపురం మండలం అజ్జకొల్లు గ్రామంలో ఆదికవి వాల్మీకి మహర్షి జయంతి వేడుకలను సోమవారం ఘనంగా నిర్వహించారు. ఈ సందర్భంగా గ్రామ పెద్దలు, యువకులు వాల్మీకి మహర్షి చిత్రపటానికి పూలమాలలు వేసి ఘనంగా నివాళులర్పించారు. అనంతరం గ్రామ యువకులు, పెద్దలు పెద్ద సంఖ్యలో పాల్గొని బైక్ ర్యాలీ నిర్వహించారు. జై వాల్మీకి, జై శ్రీరామ్ నినాదాలతో గ్రామ ప్రధాన వీధుల గుండా ర్యాలీ కొనసాగింది. ఈ కార్యక్రమంతో గ్రామంలో పండుగ వాతావరణం నెలకొంది. ఈ సందర్భంగా గ్రామ అధ్యక్షుడు కావలి శ్రీనివాసులు మాట్లాడుతూ… అజ్జకొల్లులో వాల్మీకి మహర్షి జయంతి వేడుకలను ఘనంగా నిర్వహించడం సంతోషంగా ఉందన్నారు. గ్రామ యువకులు, పెద్దలు పెద్ద సంఖ్యలో పాల్గొని బైక్ ర్యాలీని విజయవంతం చేశారని తెలిపారు. బోయవాడు రత్నాకరుడు తన తపస్సుతో మహర్షిగా మారి ప్రపంచానికి రామాయణ మహాకావ్యాన్ని అందించిన మహనీయుడు వాల్మీకి అని పేర్కొన్నారు. ఆయన జీవితం, బోధించిన ధర్మమార్గం నేటి యువతకు ఆదర్శమని అన్నారు. ఇలాంటి కార్యక్రమాలు గ్రామంలో ఐక్యతను పెంపొందించడంతో పాటు సాంస్కృతిక విలువలను కాపాడేందుకు దోహదపడతాయని తెలిపారు. ఈ కార్యక్రమంలో గ్రామ పెద్దలు తోకలి గోకర్, గుంటిపల్లి సవరయ్య, కావలి దశరథ, తోకల రవి, బడికిని విష్ణు శాంతమూర్తి, ఎద్దుల లక్ష్మన్న, మేస్త్రి రాములు, చైర్మన్ రాములు, సాయిబాబా, కావలి దశరథం, కావలి అశోక్ కుమార్, వార్డు సభ్యులు, గ్రామ పెద్దలు, యువకులు, భక్తులు పెద్ద సంఖ్యలో పాల్గొన్నారు.