రూ.3.66 కోట్ల నిధులు రైతుల ఖాతాల్లో జమ
అశ్వారావుపేట,పొలిటికల్ పవర్ అక్టోబర్ 30:ప్రధానమంత్రి కిసాన్ సమ్మాన్ నిధి పథకం 24వ విడతలో అశ్వారావుపేట నియోజకవర్గంలోని 18,322 మంది రైతుల ఖాతాల్లో రూ.3,66,44,000 జమయ్యాయని వ్యవసాయ శాఖ సహాయ సంచాలకులు పెంటేల రవికుమార్ తెలిపారు. శుక్రవారం అశ్వారావుపేట రైతు వేదికలో నిర్వహించిన వీడియో కాన్ఫరెన్స్‌లో ఆయన ఈ వివరాలు వెల్లడించారు.
మండలాల వారీగా అశ్వారావుపేటలో 5,246 మంది రైతులకు రూ.104.92 లక్షలు, దమ్మపేటలో 5,238 మందికి రూ.104.76 లక్షలు, ములకలపల్లిలో 3,832 మందికి రూ.76.64 లక్షలు, చంద్రుగొండలో 2,660 మందికి రూ.53.20 లక్షలు, అన్నపురెడ్డిపల్లిలో 1,356 మందికి రూ.27.12 లక్షలు జమయ్యాయి.
ఈ కార్యక్రమంలో వ్యవసాయ అధికారి శ్రీనివాసరావు, ఏఈఓలు సతీష్, రవీంద్ర, షకీరా భాను పాల్గొన్నారు.