పార్టీకి రాజీనామా చేసిన వారు ఇప్పుడు కార్యకర్తలమంటూ మాట్లాడటం విడ్డూరం: జుజ్జురపు వెంకన్నబాబు
అశ్వారావుపేట, పొలిటికల్ పవర్, అర్ సి ఇంచార్జ్, మేడపురెడ్డి నాగార్జున : అశ్వారావుపేట మండల బీఆర్ఎస్ పార్టీలో గ్రామ కమిటీల నియామకం, పార్టీ కార్యక్రమాల నిర్వహణపై అంతర్గత విభేదాలు మరోసారి తెరపైకి వచ్చాయి. ఇటీవల ఓ పత్రికలో ప్రచురితమైన కథనాన్ని ఖండిస్తూ బీఆర్ఎస్ పార్టీ అశ్వారావుపేట మండల మాజీ అధ్యక్షుడు జుజ్జురపు వెంకన్నబాబు వివరణ ఇచ్చారు.
ఎన్నికల సమయంలో పార్టీకి రాజీనామా చేసిన వారు, పార్టీ కష్టకాలంలో అండగా నిలవకుండా ఇప్పుడు పార్టీ కార్యకర్తలమంటూ మాట్లాడటం విడ్డూరంగా ఉందని విమర్శించారు. కాంగ్రెస్ ప్రభుత్వ వెయ్యి రోజుల పాలనకు వ్యతిరేకంగా పార్టీ చేపట్టిన కార్యక్రమాలకు వాట్సాప్ ద్వారా సమాచారం అందించినప్పటికీ, వారు ఏ ఒక్క కార్యక్రమంలోనూ పాల్గొనలేదని ఆరోపించారు.
పార్టీ జిల్లా ఇన్‌చార్జి, నియోజకవర్గ ఇన్‌చార్జి, మాజీ ఎమ్మెల్యే మెచ్చా నాగేశ్వరరావు ఆదేశాలకు అనుగుణంగా తాము పార్టీ బలోపేతానికి కృషి చేస్తున్నామని తెలిపారు. అయితే కొందరు నాయకులు పార్టీ నిర్ణయాలకు విరుద్ధంగా కార్యక్రమాలు నిర్వహిస్తూ పార్టీని రెండు వర్గాలుగా విభజించారని ఆరోపించారు.
తిరుమలకుంట గ్రామంలో పార్టీని బలోపేతం చేయాలనే ఉద్దేశంతోనే గ్రామ శాఖ కమిటీని ఏర్పాటు చేశామని, ఈ విషయంలో నియోజకవర్గ ఇన్‌చార్జి లేదా మండల కోఆర్డినేటర్‌కు సంబంధం లేదని స్పష్టం చేశారు. గతంలో మూడుసార్లు గ్రామ పార్టీ అధ్యక్షుడిగా అవకాశం పొందినప్పటికీ, గ్రామంలో పార్టీని వర్గాలుగా విభజించారని కొందరు నాయకులపై విమర్శలు చేశారు.
కొత్తగూడెంలో జరిగిన ఎమ్మెల్సీ ఎన్నికల సన్నాహక సమావేశంలోనూ కొందరు నాయకులు కావాలనే వివాదం సృష్టించి సమావేశానికి అంతరాయం కలిగించారని ఆరోపించారు. పార్టీ అంతర్గత సమస్యలను బయటకు తీసుకెళ్లి సమావేశాలు నిర్వహించడం వల్ల పార్టీ ప్రతిష్ఠ దెబ్బతింటోందన్నారు.
సోషల్ మీడియాలో టీమ్ పేర్లతో ప్రచారం చేయడం కూడా పార్టీకి నష్టం కలిగించిందని పేర్కొన్నారు. తాము ఎవరినీ పార్టీ నుంచి తొలగిస్తామని ఎక్కడా ప్రకటించలేదని, సభ్యత్వాల విషయంలోనూ వాస్తవాలు తెలుసుకుని మాట్లాడాలని సూచించారు.
పార్టీ అనేది ఒక్కరిది కాదని, అందరూ కలిసికట్టుగా పనిచేస్తేనే బలోపేతం అవుతుందని వెంకన్నబాబు పేర్కొన్నారు. ఇప్పటికైనా వ్యక్తిగత విభేదాలను పక్కనపెట్టి పార్టీ అభివృద్ధి కోసం ఐక్యంగా పనిచేయాలని కోరారు.