ఖమ్మం, నవంబర్ 13 (పొలిటికల్ పవర్ – ఆంధ్రప్రదేశ్, తెలంగాణ రాష్ట్రాల బ్యూరో ఇంచార్జ్ యర్ర నాగరాజు రెడ్డి):
తెలంగాణ రాజ్యాధికార పార్టీ (టీఆర్పీ) రాష్ట్ర వ్యవస్థాపక అధ్యక్షులు, గౌరవ ఎమ్మెల్సీ తీన్మార్ మల్లన్న గారు ఈ నెల 19వ తేదీన ఖమ్మం జిల్లాలో నిర్వహించనున్న పాదయాత్రను విద్యార్థులంతా ఏకమై విజయవంతం చేయాలని ఆ పార్టీ ఖమ్మం జిల్లా అధ్యక్షులు దామాల సత్యం పిలుపునిచ్చారు.
గురువారం ఖమ్మం జిల్లా కమిటీ ఆధ్వర్యంలో పట్టణంలోని వివిధ ప్రాంతాల్లో నాయకులు పర్యటించి విద్యార్థులను నేరుగా కలిశారు. ఈ నెల 19న జరగనున్న పాదయాత్ర కరపత్రాలను అందజేస్తూ, పెద్ద ఎత్తున తరలిరావాలని ఆహ్వానించారు.
సామాజిక న్యాయం కోసం విద్యార్థులు కదం తొక్కాలి:
ఈ సందర్భంగా జిల్లా అధ్యక్షులు దామాల సత్యం మాట్లాడుతూ.. సమాజ మార్పులో విద్యార్థులు, యువత కీలక పాత్ర పోషించాల్సిన సమయం ఆసన్నమైందన్నారు. విద్యార్థుల హక్కుల పరిరక్షణ, నిరుద్యోగుల సమస్యల పరిష్కారం, సామాజిక న్యాయం మరియు బహుజన రాజ్యాధికార సాధన కోసం తీన్మార్ మల్లన్న అలుపెరగని పోరాటం చేస్తున్నారని కొనియాడారు. ప్రజా సమస్యల ఎజెండాగా సాగుతున్న ఈ పాదయాత్రలో ప్రతి విద్యార్థి భాగస్వామి కావాలని కోరారు.
పాల్గొన్న నాయకులు:
ఈ ప్రచార కార్యక్రమంలో తెలంగాణ రాజ్యాధికార పార్టీ ఖమ్మం జిల్లా అధ్యక్షులు దామాల సత్యం, యువజన విభాగం జిల్లా అధ్యక్షులు తేలపుట్ట జగపతి, యువజన విభాగం జిల్లా ఉపాధ్యక్షులు పెరమలపల్లి నాగార్జున, మేడి పండు, విద్యార్థి విభాగం నాయకులు ఆదూరి అజయ్, శ్రీను, రాజేష్, వెంకట్ రమణ తదితరులు పాల్గొన్నారు.