భూసేకరణలో పారదర్శకత, నిష్పక్షపాతమే కీలకం

📰 Generate e-Paper Clip

అర్హులైన రైతులకు చట్టప్రకారం పరిహారం అందించాలి: కలెక్టర్ రాహుల్ శర్మ పొలిటికల్ పవర్ సమగ్ర జాతీయ తెలుగు దీనపత్రిక / పిఎన్9 టీవీ తెలుగు న్యూస్ భూపాలపల్లి జిల్లా ప్రతినిధి సెప్టెంబర్ 24 2026: జిల్లాలో వివిధ అభివృద్ధి ప్రాజెక్టులకు అవసరమైన భూసేకరణ ప్రక్రియను చట్టబద్ధంగా, పారదర్శకంగా నిర్వహించాలని భూపాలపల్లి జిల్లా కలెక్టర్ రాహుల్ శర్మ రెవెన్యూ అధికారులను, సిబ్బందిని ఆదేశించారు. గురువారం ఐడీఓసీ కార్యాలయంలో భూసేకరణ చట్టాలు, నిబంధనలు, ప్రభుత్వ ఉత్తర్వులు, న్యాయస్థానాల తీర్పులపై రెవెన్యూ అధికారులకు ఒకరోజు శిక్షణ కార్యక్రమం నిర్వహించారు. హెచ్‌ఎండీఏ, టీజీఐఐసీలో ఓఎస్డీగా విధులు నిర్వహిస్తున్న మనోహర్ ఈ శిక్షణ కార్యక్రమంలో పాల్గొని భూసేకరణకు సంబంధించిన పలు అంశాలపై అవగాహన కల్పించారు. జిల్లాలో ఇరిగేషన్, సింగరేణి, జెన్‌కో, జాతీయ రహదారులు తదితర అభివృద్ధి ప్రాజెక్టుల కోసం భూసేకరణ జరుగుతోందని కలెక్టర్ తెలిపారు. అన్ని మండలాల్లో భూసేకరణ ప్రక్రియ కొనసాగుతున్న నేపథ్యంలో అర్హులైన రైతులకు చట్టప్రకారం పరిహారం, పునరావాసం, పునరావాస ప్రయోజనాలు అందేలా చర్యలు తీసుకోవాలని సూచించారు. భూసేకరణకు సంబంధించి రైతుల సందేహాలను ఎప్పటికప్పుడు నివృత్తి చేస్తూ, ప్రక్రియలో ఎలాంటి జాప్యానికి తావులేకుండా చూడాలని కలెక్టర్ స్పష్టం చేశారు. అర్హులైన ఏ ఒక్క రైతుకూ అన్యాయం జరగకుండా అధికారులు నిష్పక్షపాతంగా వ్యవహరించాలని ఓఎస్డీ మనోహర్ సూచించారు. భూసేకరణ చట్టాలకు అనుగుణంగా ప్రతి దశను పక్కాగా నమోదు చేయడంతో పాటు అవసరమైన చోట మినిట్స్ నమోదు, వీడియో రికార్డింగ్ చేపట్టాలని తెలిపారు. భూములు ఇచ్చే రైతులను కేవలం భూమి ఇచ్చేవారిగా కాకుండా అభివృద్ధి ప్రాజెక్టుల్లో భాగస్వాములుగా గౌరవించాలని, అధికారుల వైఖరి వల్ల వారి మనోభావాలు దెబ్బతినకుండా జాగ్రత్తలు తీసుకోవాలని మనోహర్ సూచించారు. అసైన్డ్, ప్రభుత్వ భూములకు సంబంధించిన వివాదాలను నిబంధనల ప్రకారం విచారించి పరిష్కరించాలని, ఆయా భూముల్లో సాగు చేసుకుంటున్న వారి అర్హతలను తహసీల్దార్లు క్షుణ్ణంగా పరిశీలించాలని తెలిపారు. భూసేకరణలో భూమి విస్తీర్ణం, రికార్డుల వివరాలు తదితర అంశాల్లో ఎలాంటి పొరపాట్లకు తావులేకుండా అధికారులు అప్రమత్తంగా వ్యవహరించాలని మనోహర్ సూచించారు. ఈ కార్యక్రమంలో కాటారం సబ్‌ కలెక్టర్ సౌరవ్ శర్మ, ఆర్డీఓ హరికృష్ణ, శిక్షణ డిప్యూటీ కలెక్టర్ నవీన్ రెడ్డి, ఏఓ శ్రీనివాసులు, అన్ని మండలాల తహసీల్దార్లు, రెవెన్యూ సిబ్బంది తదితరులు పాల్గొన్నారు.