గున్నేపల్లిలో వారసత్వ భూమి కోసం ముగ్గురు కుమార్తెల ఆవేదన
మొబైల్‌ కోర్టు ఆదేశాలున్నా పరిష్కారం లేదని బాధితుల ఆరోపణ.. రెవెన్యూ అధికారులు స్పందించాలని వేడుకోలు
పొలిటికల్ పవర్,దమ్మపేట, అక్టోబర్11: “ఆడబిడ్డలుగా పుట్టడమే మా నేరమా మా తండ్రి ఆస్తిలో మాకు హక్కు లేదా? న్యాయం కోసం ఎన్నిసార్లు కార్యాలయాల చుట్టూ తిరగాలి?” అంటూ వారసత్వ భూమి కోసం పోరాడుతున్న మహిళలు ఆవేదన వ్యక్తం చేస్తున్నారు. తమ తండ్రికి చెందిన భూమిని తమకు అప్పగించకపోతే బతకడం కూడా కష్టమవుతోందని, న్యాయం జరగకుంటే చావే శరణ్యమని వారు వాపోతున్నారు. భద్రాద్రి కొత్తగూడెం జిల్లా దమ్మపేట మండలం గున్నేపల్లిలో ఈ ఘటన వెలుగుచూసింది.
తండ్రి భూమి కోసం ఏళ్లుగా పోరాటం
బాధితులు తెలిపిన వివరాల ప్రకారం.. గున్నేపల్లి రెవెన్యూ పరిధిలోని సర్వే నంబర్‌ 86/1లో గంటా కొర్రయ్య పేరుపై 5 ఎకరాల 2 కుంటల భూమి ఉంది. కొర్రయ్య 1997లో మరణించగా, ఆయనకు ముగ్గురు కుమార్తెలు ఉన్నారు. వారికి వివాహాలు జరిగాయి. అయితే, తమ తండ్రి మరణానంతరం వారసత్వంగా రావాల్సిన భూమిని తమకు అప్పగించకుండా బంధువైన లక్ష్మయ్య తన ఆధీనంలో ఉంచుకున్నారని బాధితులు ఆరోపిస్తున్నారు.
తమకు వివాహాలు జరిగిన కారణంగా తండ్రి ఆస్తిలో వాటా లేదంటూ భూమిని అప్పగించేందుకు నిరాకరిస్తున్నారని వారు వాపోతున్నారు. తమ హక్కుల కోసం పలుమార్లు సంబంధిత అధికారులను ఆశ్రయించినా సమస్య పరిష్కారం కావడం లేదని ఆవేదన వ్యక్తం చేస్తున్నారు.
కోర్టు ఆదేశాలున్నా న్యాయం దక్కలేదా?
తమ వద్ద భూమికి సంబంధించిన ఆధారాలు ఉన్నాయని, మొబైల్‌ కోర్టు కూడా తమ తండ్రికి చెందిన భూమిని తమకు అప్పగించాలని ఆదేశాలు జారీ చేసిందని బాధిత మహిళలు చెబుతున్నారు. అయినప్పటికీ స్థానిక రెవెన్యూ అధికారులు ఆ ఆదేశాల అమలుపై తగిన చర్యలు తీసుకోవడం లేదని ఆరోపిస్తున్నారు. తమ వద్ద ఉన్న పత్రాలను రెవెన్యూ ఇన్‌స్పెక్టర్‌ (ఆర్‌ఐ)కు అందించినా స్పందన లేదని పేర్కొన్నారు.
తమ సమస్య పరిష్కారమవుతుందనే ఆశతో ప్రభుత్వ కార్యాలయాల చుట్టూ, కోర్టుల చుట్టూ తిరుగుతున్నామని, అయినా ఫలితం కనిపించడం లేదని ఆవేదన వ్యక్తం చేశారు. ప్రస్తుతం తహసీల్దార్‌గా బాధ్యతలు నిర్వహిస్తున్న ట్రైనీ డిప్యూటీ కలెక్టర్‌ అయినా తమ సమస్యను పరిష్కరిస్తారని ఆశించామని, కానీ ఇప్పటివరకు ఆశించిన స్పందన లేదని వాపోయారు.
ఒకరి మరణంతో మరింత విషాదం
న్యాయం కోసం ఏళ్ల తరబడి పోరాడుతున్న క్రమంలో తమ అక్క మరణించిందని బాధితులు కన్నీరుమున్నీరుగా విలపించారు. తమ కుటుంబానికి చెందిన భూమి సమస్య పరిష్కారం కాకపోవడంతో తీవ్ర మానసిక వేదనకు గురవుతున్నామని తెలిపారు.
జిల్లా ఉన్నతాధికారులు ఈ వ్యవహారంపై తక్షణమే స్పందించి, భూమికి సంబంధించిన రెవెన్యూ రికార్డులు, కోర్టు ఆదేశాలను పరిశీలించాలని బాధిత మహిళలు కోరుతున్నారు. చట్టప్రకారం తమకు హక్కు ఉంటే వారసత్వ భూమిని అప్పగించేలా చర్యలు తీసుకోవాలని విజ్ఞప్తి చేస్తున్నారు. మహిళలకు న్యాయం జరిగేలా సంబంధిత అధికారులు జాప్యం లేకుండా విచారణ చేపట్టి సమస్యకు పరిష్కారం చూపాలని కోరుతున్నారు.