ప్రధానోపాధ్యాయులు సత్యప్రసాద్
పొలిటికల్ పవర్ సమగ్ర జాతీయ తెలుగు దీనపత్రిక / పిఎన్9 టీవీ తెలుగు న్యూస్ ఉపేందర్ కూరెళ్ళ అక్టోబర్ 27 2026: కేంద్ర ప్రభుత్వం ప్రతిష్టాత్మకంగా నిర్వహిస్తున్న ఏక్ భారత్ శ్రేష్ఠ భారత్ (ఇ.బి ఎస్.బి) కార్యక్రమంలో భాగంగా జిల్లా పరిషత్ ఉన్నత పాఠశాల మెడిపల్లి లో ఈ రోజు హర్యానా రాష్ట్ర సంస్కృతి, సంప్రదాయాలపై ప్రత్యేక కార్యక్రమాన్ని అత్యంత ఉత్సాహంగా నిర్వహించారు. ఈ కార్యక్రమానికి పాఠశాల ప్రధానోపాధ్యాయులు ఎల్. సత్య ప్రసాద్ అధ్యక్షత వహించారు. ఆయన మాట్లాడుతూ… భారతదేశం భిన్న సంస్కృతులు, భిన్న భాషలు కలిగిన దేశమైనప్పటికీ, మనందరం ఒకే తల్లి బిడ్డలం అని, ఇదే మన భారతదేశ ఔన్నత్యమని పేర్కొన్నారు. ఏక్ భారత్ శ్రేష్ఠ భారత్ కార్యక్రమ ముఖ్య ఉద్దేశం విద్యార్థులలో దేశంలోని ఇతర రాష్ట్రాల సంస్కృతి పట్ల అవగాహన, గౌరవం పెంపొందించడమేనని తెలిపారు.
హర్యానా సంస్కృతి పరిచయం:
ఈ సందర్భంగా ఉపాధ్యాయులు విద్యార్థులకు హర్యానా రాష్ట్ర విశిష్టతను వివరించారు.
చరిత్ర & భౌగోళికం: హర్యానా అంటే ‘దేవుని నివాసం’ అని అర్థం. మహాభారత కురుక్షేత్రం ఇక్కడే ఉంది. రాజధాని చండీగఢ్.
భాష: ప్రధానంగా హర్యాన్వీ, హిందీ భాషలు మాట్లాడతారు.
వేషధారణ: పురుషులు ధోతి-కుర్తా, పగడీ ధరిస్తే, మహిళలు రంగురంగుల ఘాగ్రా-చోలీ, ఓఢ్నీ ధరిస్తారు. ఫుల్కారీ ఎంబ్రాయిడరీ ప్రపంచ ప్రసిద్ధి.
జానపద కళలు: ఫాగ్, సాంగ్, ధమాల్, గూమర్ వంటి జానపద నృత్యాలు, రాగిణి జానపద గేయాలు హర్యానాకు ప్రత్యేకం.
ఆహారం: బాజ్రా రోటీ, సర్సోంకా సాగ్, లస్సీ, చూర్మా వంటివి ప్రసిద్ధ వంటకాలు.
ప్రత్యేకతలు: పాల ఉత్పత్తిలో, కుస్తీ, కబడ్డీ వంటి క్రీడలలో హర్యానా దేశంలోనే అగ్రగామి.
విద్యార్థులు హర్యానా సంస్కృతికి సంబంధించిన చిత్రాలను, నృత్య వీడియోలను, మ్యాప్ లను ఆసక్తిగా వీక్షించారు. కొంతమంది విద్యార్థులు హర్యానా వేషధారణలో పాల్గొని సాంస్కృతిక ప్రదర్శన చేశారు. ఈ కార్యక్రమంలో పాఠశాల ఉపాధ్యాయ బృందం అందరూ పాల్గొని విద్యార్థులను ప్రోత్సహించారు. విద్యార్థులు భిన్నత్వంలో ఏకత్వం అనే భారతీయ స్ఫూర్తిని ఆనందంగా అభ్యసించారు. ఇలాంటి కార్యక్రమాలు విద్యార్థులలో జాతీయ సమైక్యత, సోదరభావాన్ని పెంపొందిస్తాయని, భవిష్యత్తులో మరిన్ని రాష్ట్రాల సంస్కృతులను పరిచయం చేస్తామని తెలిపారు.