టేకులపల్లి (పొలిటికల్ పవర్ – పీఎన్ 9 న్యూస్ / కాకటి సత్యప్రసాద్):
భద్రాద్రి కొత్తగూడెం జిల్లా టేకులపల్లి మండల పరిధిలోని మేళ్లమడుగు పంచాయతీ చర్లపల్లి గ్రామంలో అధికారుల నిర్లక్ష్యం మూలంగా గ్రామస్థులు నిత్యం తీవ్ర ఇబ్బందులు ఎదుర్కొంటున్నారు. గ్రామానికి బీటీ రోడ్డు నిర్మించేందుకు నిధులు మంజూరై ఏడు నెలలు గడుస్తున్నప్పటికీ, ఇప్పటివరకు పనులు ప్రారంభించకపోవడంపై స్థానికులు తీవ్ర ఆగ్రహం వ్యక్తం చేస్తున్నారు.
ఈ సందర్భంగా చర్లపల్లి 8వ వార్డు నివాసి మరియు గ్రామస్థులు మాట్లాడుతూ.. గ్రామానికి రోడ్డు మంజూరై ఏడు నెలలు కావస్తున్నా, పనులు ప్రారంభించడంలో పాలకులు, అధికారులు ఘోరంగా విఫలమయ్యారని ఆవేదన వ్యక్తం చేశారు. రాకపోకలకు సరైన దారి లేక రైతులు తమ పంట పొలాలకు వెళ్లడానికి, వ్యవసాయ ఉత్పత్తులను తరలించడానికి నానా అవస్థలు పడుతున్నారని తెలిపారు. అంతేకాకుండా పాఠశాలలకు వెళ్లే చిన్న పిల్లలు, విద్యార్థులు నిత్యం గుంతల రోడ్డుపై ప్రయాణిస్తూ ఇబ్బందులు ఎదుర్కొంటున్నారని వాపోయారు.
ప్రజాప్రతినిధులు, సంబంధిత కాంట్రాక్టర్లు తక్షణమే స్పందించి, మంజూరైన బీటీ రోడ్డు పనులను వెంటనే పూర్తిచేసి తమ రవాణా కష్టాల నుండి విముక్తి కల్పించాలని చర్లపల్లి గ్రామ ప్రజలు డిమాండ్ చేస్తున్నారు.