గార్ల (పొలిటికల్ పవర్ – మాలోత్ అజయ్ నాయక్):
గార్ల మండల పరిధిలోని శేరిపురం గ్రామంలో ఉన్న రైతు వేదిక వద్ద వ్యవసాయ శాఖ ఆధ్వర్యంలో మంగళవారం రైతులకు ప్రత్యేక వ్యవసాయ అవగాహన సదస్సు నిర్వహించారు. ఈ కార్యక్రమానికి సర్పంచ్ గుగులోత్ భారతి అధ్యక్షత వహించారు.
ఈ సందర్భంగా మండల వ్యవసాయ అధికారి (ఏవో) కావటి రామారావు హాజరై రైతులకు పలు సూచనలు చేశారు. ఆయన మాట్లాడుతూ.. ప్రకృతి వ్యవసాయం ద్వారా భూసారం పెరగడమే కాకుండా, పర్యావరణ పరిరక్షణ మరియు ఆరోగ్యకరమైన దిగుబడులు సాధించవచ్చని తెలిపారు. ప్రతి ఒక్క రైతు రసాయన ఎరువుల వాడకాన్ని తగ్గించి జీవామృతం, ఘనజీవామృతం, నీమాస్త్రం, దశపర్ణి కషాయం వంటి సేంద్రియ పద్ధతులను అవలంబించాలని పిలుపునిచ్చారు.
అనంతరం వ్యవసాయ అధికారులు రైతులకు జీవామృతం, ఘనజీవామృతం తయారీ విధానం, పంటలపై పిచికారీ చేసే పద్ధతులు మరియు వాటి వినియోగంపై క్షేత్రస్థాయిలో ప్రత్యక్షంగా శిక్షణ ఇచ్చి అవగాహన కల్పించారు.
ఈ కార్యక్రమంలో వ్యవసాయ విస్తరణాధికారి (ఏఈఓ) రాజ్యలక్ష్మి, ఇరిగేషన్ ఏఈ భరత్, గ్రామ ఉప సర్పంచ్, వ్యవసాయ శాఖ సిబ్బంది మరియు స్థానిక రైతులు పెద్ద సంఖ్యలో పాల్గొన్నారు.