పాలకులు మారుతున్నా.. పేదల బతుకులు మారవా?
లచ్చాపురం ఎస్సీ కాలనీలో వరద నీటిలో మునిగిన ఇళ్లు.. నిలువ నీడ కోసం బాధితుల ఎదురుచూపులు
పొలిటికల్ పవర్,దమ్మపేట, నవంబర్ 4: భారీ వర్షాలు కురిస్తే చాలు.. పేదల ఇళ్లలోకి వరద నీరు చేరుతోంది. రేకుల షెడ్లు, గుడిసెల్లో జీవనం సాగిస్తున్న నిరుపేద కుటుంబాల బతుకులు ప్రతి వర్షాకాలంలో నీటిపాలవుతున్నాయి. భద్రాద్రి కొత్తగూడెం జిల్లా దమ్మపేట మండలం లచ్చాపురం గ్రామంలోని ఎస్సీ కాలనీలో కనిపిస్తున్న దృశ్యాలు పేదల దుస్థితికి అద్దం పడుతున్నాయి
భారీ వర్షాల కారణంగా కాలనీలోని పలు ఇళ్లలోకి వరద నీరు చేరడంతో కుటుంబాలు తీవ్ర ఇబ్బందులు ఎదుర్కొంటున్నాయి. మోకాళ్ల లోతు నీటిలో నిలబడాల్సిన పరిస్థితి ఏర్పడగా, ఇళ్లలోని వస్తువులు తడిసిపోయి రోజువారీ జీవనం అస్తవ్యస్తమైంది. సొంత ఇళ్లు లేక రేకుల షెడ్లు, గుడిసెల్లోనే కాలం వెళ్లదీస్తున్న కుటుంబాలకు వర్షాలు మరింత కష్టాలను తెచ్చిపెడుతున్నాయి.
పాలకులు మారుతున్నా.. పేదలకు శాశ్వత పరిష్కారం ఎక్కడ?
ప్రభుత్వాలు మారుతున్నాయి.. పాలకులు మారుతున్నారు.. కానీ పేదల తలదాచుకునే గూడు సమస్య మాత్రం ఎందుకు పరిష్కారం కావడం లేదని స్థానికులు ప్రశ్నిస్తున్నారు. ప్రతి వర్షాకాలంలో ఇదే పరిస్థితి ఎదురవుతున్నా శాశ్వత పరిష్కారం దిశగా చర్యలు కనిపించడం లేదని బాధితులు ఆవేదన వ్యక్తం చేస్తున్నారు. పేదలకు ఇళ్లు మంజూరు చేస్తామని హామీలు ఇస్తున్న పాలకులు, క్షేత్రస్థాయిలో ఇలాంటి కుటుంబాల పరిస్థితిని ఎప్పుడు పరిశీలిస్తారని నిలదీస్తున్నారు.
ఎమ్మెల్యే జారె ఆదినారాయణ స్పందించాలి
లచ్చాపురం ఎస్సీ కాలనీలో వరద నీటితో ఇబ్బందులు పడుతున్న కుటుంబాల పరిస్థితిని స్థానిక అధికారులు, ప్రజాప్రతినిధులు, అశ్వారావుపేట ఎమ్మెల్యే జారె ఆదినారాయణ వెంటనే పరిశీలించాలని బాధితులు కోరుతున్నారు. ముందుగా వరద నీరు తొలగించి, అవసరమైన తక్షణ సహాయక చర్యలు చేపట్టాలని విజ్ఞప్తి చేస్తున్నారు. ఇల్లు లేని అర్హులైన పేద కుటుంబాలను గుర్తించి ఇందిరమ్మ ఇళ్లు మంజూరు చేయడంతో పాటు, కాలనీలో వరద నీరు నిల్వ ఉండకుండా శాశ్వత డ్రైనేజీ, నీటి పారుదల సౌకర్యాలు కల్పించాలని కోరుతున్నారు.
లచ్చాపురం ఎస్సీ కాలనీకి చెందిన పొడితోరి పండు, ఆయన భార్య నాగమణి, పిల్లలు వర్షిత్, వర్షిణి కుటుంబం కూడా ఈ పరిస్థితులతో ఇబ్బందులు ఎదుర్కొంటోంది. ఈ కుటుంబంతో పాటు ఇబ్బందులు పడుతున్న ఇతర బాధితుల సమస్యలను అధికారులు, ఎమ్మెల్యే ప్రత్యేకంగా దృష్టిలో పెట్టుకోవాలని స్థానికులు విజ్ఞప్తి చేస్తున్నారు.
పేదలకు పక్కా ఇళ్లు, మెరుగైన మౌలిక వసతులు కల్పిస్తామని చెప్పే పాలకులు.. వర్షం వస్తే ఇళ్లలోకి నీరు చేరి అవస్థలు పడుతున్న ఈ కుటుంబాలకు ఎప్పుడు శాశ్వత పరిష్కారం చూపిస్తారు? మరో వర్షాకాలం వచ్చే వరకు బాధితులు ఇలాగే ఇబ్బందులు పడాల్సిందేనా? ఇప్పటికైనా అధికారులు, ప్రజాప్రతినిధులు స్పందించి వారికి భద్రమైన నివాసం కల్పించాలని స్థానికులు కోరుతున్నారు.