మాటల్లో కాదు.. చేతల్లో చూపించిన ఎమ్మెల్యే జారే
నిరుపేదల దశాబ్దాల కల సాకారం.. కాలనీలో విద్యుత్ వెలుగులు
కాలనీవాసుల కష్టాలకు పరిష్కారం.. కొత్త విద్యుత్ లైన్ ప్రారంభించిన ఎమ్మెల్యే జారే
పొలిటికల్ పవర్, దమ్మపేట, సెప్టెంబర్ 20:దశాబ్దాలుగా విద్యుత్ సౌకర్యం కోసం ఎదురుచూస్తున్న నిరుపేదల కల నెరవేరింది. దమ్మపేట మండలం మల్లారం గ్రామ సమీపంలోని యార్లగడ్డ భాస్కరరావు కాలనీలో ఎమ్మెల్యే జారే ఆదినారాయణ చొరవతో నూతన విద్యుత్ లైన్, విద్యుత్ స్తంభాలు, వీధిదీపాలు ఏర్పాటు చేశారు. నూతన విద్యుత్ సౌకర్యాన్ని ఎమ్మెల్యే జారే ఆదినారాయణ స్వయంగా ప్రారంభించారు.
గత ఐదేళ్లుగా విద్యుత్ స్తంభాలు, వీధిదీపాలు లేక కాలనీవాసులు రాత్రి వేళల్లో తీవ్ర ఇబ్బందులు ఎదుర్కొంటున్నారు. ముఖ్యంగా మహిళలు, వృద్ధులు, చిన్నారులు చీకటి కారణంగా అవస్థలు పడేవారు. కాలనీవాసుల సమస్యను తెలుసుకున్న ఎమ్మెల్యే జారే ఆదినారాయణ వెంటనే స్పందించి సంబంధిత అధికారులతో మాట్లాడి విద్యుత్ సౌకర్యం కల్పించేందుకు చర్యలు చేపట్టారు.
పనులు పూర్తయిన అనంతరం కాలనీలో నూతన విద్యుత్ లైన్, వీధిదీపాలను ప్రారంభించడంతో కాలనీ మొత్తం విద్యుత్ వెలుగులతో కళకళలాడింది. దీంతో కాలనీవాసులు ఆనందం వ్యక్తం చేశారు.
ఈ సందర్భంగా ఎమ్మెల్యే జారే ఆదినారాయణ మాట్లాడుతూ.. ప్రజలకు అవసరమైన మౌలిక సదుపాయాలు కల్పించడం తన బాధ్యత అన్నారు. యార్లగడ్డ భాస్కరరావు కాలనీలో విద్యుత్ సౌకర్యం లేక ప్రజలు ఇబ్బందులు పడుతున్న విషయం తన దృష్టికి రావడంతో వెంటనే చర్యలు తీసుకున్నామని తెలిపారు. నియోజకవర్గంలోని ప్రతి గ్రామంలో ప్రజలకు అవసరమైన మౌలిక వసతులను అందించేందుకు నిరంతరం కృషి చేస్తానని చెప్పారు.
ఏళ్లుగా పరిష్కారం కాని సమస్యను ఎమ్మెల్యే జారే ఆదినారాయణ చొరవతో పరిష్కరించడంపై కాలనీవాసులు హర్షం వ్యక్తం చేశారు. తమ ఇళ్లలో వెలుగులు నింపిన ఎమ్మెల్యే జారే ఆదినారాయణకు, సర్పంచ్ పగడాల రమాదేవి రాంబాబుకు కాలనీవాసులు, ప్రజాప్రతినిధులు హృదయపూర్వక కృతజ్ఞతలు తెలిపారు.