రేడియల్ రోడ్డు-2 టెండర్లలో రూ. 600 కోట్ల భారీ స్కామ్ ఆరోపణలు.. హైకోర్టుకు చేరిన పంచాయితీ!
హైదరాబాద్ / పొలిటికల్ పవర్ బ్యూరో (యర్ర నాగరాజు రెడ్డి): తెలంగాణ కాంగ్రెస్ రాజకీయంలో ముఖ్యమంత్రి రేవంత్ రెడ్డి, సీనియర్ నేత కోమటిరెడ్డి రాజగోపాల్ రెడ్డిల మధ్య అంతర్గత పోరు తీవ్రస్థాయికి చేరింది. హైదరాబాద్ గ్రోత్ కారిడార్ లిమిటెడ్ (HGCL) చేపట్టిన రేడియల్ రోడ్డు-2 నిర్మాణ టెండర్లలో బిగ్ స్కామ్ జరిగిందనే ఆరోపణలు ఇప్పుడు రాష్ట్రంలో తీవ్ర సంచలనం సృష్టిస్తున్నాయి. అర్హత ఉన్న సంస్థలను పక్కన పెట్టి, అత్యంత దారుణంగా రూ.600 కోట్లు ఎక్కువ కోట్ చేసిన సంస్థలకు కాంట్రాక్టులు కట్టబెట్టడంపై రాజగోపాల్ రెడ్డికి చెందిన ‘సుశీ ఇన్‌ఫ్రా’ కంపెనీ హైకోర్టును ఆశ్రయించింది.
‘పొలిటికల్ పవర్’ సమగ్ర జాతీయ తెలుగు దినపత్రిక అందించే ప్రత్యేక దర్యాప్తు కథనం..
ప్రాజెక్టు స్పెసిఫికేషన్స్ & బిడ్డింగ్ కథాకమామిషు
- ప్రాజెక్టు: బుద్వేల్ ORR నుంచి కొడంగల్ సమీపంలోని NH-167N వరకు 81.15 కిలోమీటర్ల ‘గ్రీన్‌ఫీల్డ్ ఎక్స్‌ప్రెస్ వే’ (రేడియల్ రోడ్డు-2).
- నిర్వహణ సంస్థ: హైదరాబాద్ గ్రోత్ కారిడార్ లిమిటెడ్ (HGCL).
- ప్రధాన వేటు: రాజగోపాల్ రెడ్డికి చెందిన సుశీ ఇన్‌ఫ్రా అండ్ మైనింగ్ లిమిటెడ్.
రూ. 600 కోట్ల మేర ప్రభుత్వ ధనానికి గండి?
ఎల్-1 (అతి తక్కువ ధర)గా ఉన్న సుశీ ఇన్‌ఫ్రా బిడ్‌ను అధికారులు సాంకేతిక వంకలతో తిరస్కరించడం వివాదానికి కేంద్రబిందువైంది.
- సాకు ఏంటంటే?: అనుభవ ధ్రువీకరణ పత్రంపై సూపర్ ఇంటెండింగ్ ఇంజనీర్ (SE) కౌంటర్ సంతకం బదులు ఎగ్జిక్యూటివ్ ఇంజనీర్ (EE) సంతకం మాత్రమే ఉందనే అతి చిన్న సాంకేతిక సాకును చూపి సుశీ ఇన్‌ఫ్రాపై అనర్హత వేటు వేశారు.
- ఎవరికి కట్టబెట్టారు?:
- ప్యాకేజీ-1: అంచనా వ్యయం కంటే 3.95% అధికంగా కోట్ చేసిన NCC లిమిటెడ్‌కు రూ. 1,286.03 కోట్ల కాంట్రాక్ట్ అప్పగింత.
- ప్యాకేజీ-2 & 3: వరుసగా BVSR మరియు GKC సంస్థలకు కేటాయింపు. ఈ రెండు సంస్థలు ఎంత ఎక్కువ కోట్ చేశాయన్న వివరాలను అధికారులు రహస్యంగా ఉంచడంపై అనేక అనుమానాలు వ్యక్తమవుతున్నాయి.
ఆరోపణ: సుశీ ఇన్‌ఫ్రా కంటే దాదాపు రూ. 600 కోట్లు ఎక్కువ ధర కోట్ చేసిన సంస్థలకు కట్టబెట్టడం వెనుక రేవంత్ రెడ్డి సన్నిహితుల భారీ ఒత్తిళ్లు ఉన్నట్లు సమాచారం.
6 రోజుల్లోనే బుల్లెట్ వేగంతో ముగిసిన ప్రాసెస్!
గత నెల 30న టెండర్ల దాఖలుకు చివరి తేదీ కాగా, కేవలం 6 పని దినాల్లోనే సాంకేతిక మదింపు పూర్తి చేయడం, సుశీ ఇన్‌ఫ్రాను అనర్హులుగా తేల్చడం, కమిటీల సిఫార్సులు రికార్డు చేసి ఆమోదాలు పొందడం, ఫైనాన్షియల్ బిడ్లు తెరచి కాంట్రాక్టులు అప్పగించడం వెంటవెంటనే చకచకా జరిగిపోయాయి.
సాధారణంగా నెలల సమయం పట్టే ప్రక్రియ ఇంత స్పీడుగా ముగియడం వెనుక సీఎంఓ (CMO) పెద్దల హస్తం ఉందనే ఆరోపణలు వస్తున్నాయి.
హైకోర్టులో పంచాయితీ.. పొలిటికల్ వర్గాల్లో గుసగుసలు
తమ కంటే రూ.600 కోట్లు ఎక్కువ కోట్ చేసిన సంస్థలకు లబ్ధి చేకూరుస్తూ, ఉద్దేశపూర్వకంగానే తమను రిజెక్ట్ చేశారని సుశీ ఇన్‌ఫ్రా తెలంగాణ హైకోర్టును ఆశ్రయించడంతో ఈ వివాదం న్యాయస్థానానికి చేరింది.
రాజగోపాల్ రెడ్డి ఆర్థికంగా మరీ బలపడితే భవిష్యత్తులో తన పదవికే ఎసరు వస్తుందనే ముందస్తు వ్యూహంతోనే, రేవంత్ రెడ్డి కావాలనే ఈ కాంట్రాక్ట్ దక్కకుండా చేశారనే ప్రచారం ముమ్మరంగా సాగుతోంది. సొంత పార్టీ ఎమ్మెల్యే కాంట్రాక్ట్‌పై సీఎం వ్యాపార వ్యూహాలతో దెబ్బకొట్టడం ఇప్పుడు గాంధీభవన్‌ వర్గాల్లో హాట్ టాపిక్‌గా మారింది.
– తెలంగాణ రాష్ట్రాల బ్యూరో ఇంచార్జి యర్ర నాగరాజు రెడ్డి (the brand) పొలిటికల్ పవర్. సమగ్ర జాతీయ దినపత్రిక