ఖమ్మం, నవంబర్ 12 (పొలిటికల్ పవర్ సమగ్ర జాతీయ తెలుగు దినపత్రిక – పొలిటికల్ న్యూస్ 9 టీవీ పరిశోధనాత్మక కథనం):
ఖమ్మం నగరంలో కబ్జాదారుల అరాచకాలు రోజురోజుకు శృతిమించుతున్నాయి. సామాన్యుడు అంగుళం జావు జాగ స్థలం కదుపుదామన్నా వంద నిబంధనలు పెట్టే అధికారులు, రాజకీయ నాయకుల అండదండలు ఉన్న బడా కబ్జాకోరుల ముందు మాత్రం మౌనం వహిస్తున్నారనే విమర్శలు నగరంలో తీవ్ర చర్చనీయాంశంగా మారాయి. ఏకంగా ప్రజలకు ఉపయోగపడాల్సిన ప్రజా రవాణా రహదారులు, మురుగునీటి కాల్వలనే కబ్జా చేసి షట్టర్లు నిర్మించుకుంటున్నా యంత్రాంగం చూసీచూడనట్లు వ్యవహరిస్తుండడంపై సర్వత్రా విమర్శలు వ్యక్తమవుతున్నాయి.
హార్కర్‌ బావి సెంటర్‌లో కబ్జాల పర్వం:
నగరంలోని అత్యంత రద్దీ ప్రాంతమైన హార్కర్‌ బావి సెంటర్‌లో కబ్జాదారులు రెచ్చిపోయారు. ప్రభుత్వ స్థలాలు, కాల్వలు, రహదారులను ఆక్రమించి ఏకంగా నాలుగు షట్టర్లను నిర్మించి అద్దెకు ఇచ్చినట్లు స్థానికులు తీవ్ర ఆరోపణలు చేస్తున్నారు.
అధికార, ప్రతిపక్షాలకు చెందిన కొందరు అండదండలు ఉండడంతోనే ఇక్కడ బహిరంగంగా నిబంధనలకు విరుద్ధంగా నిర్మాణాలు చేపట్టారనే గుసగుసలు వినిపిస్తున్నాయి. అధికారులు క్షేత్రస్థాయిలో విచారణ జరిపి కొలతలు వేస్తేనే ఈ అక్రమాల బండారం పూర్తిగా బట్టబయలవుతుందని స్థానికులు డిమాండ్ చేస్తున్నారు.
నిత్యం ట్రాఫిక్ నరకం.. ప్రజలకు తప్పని ఇబ్బందులు:
హార్కర్‌ బావి సెంటర్‌ అంటేనే ఎప్పుడూ రద్దీగా ఉండే ప్రాంతం. ప్రధాన మార్కెట్‌కు వెళ్లే దారి కావడంతో పాటు, సమీపంలోనే పాఠశాల, త్రీటౌన్ పోలీస్ స్టేషన్, రైతుబజార్ ఉండడంతో నిత్యం వేలాది మంది ఈ మార్గంలో రాకపోకలు సాగిస్తుంటారు. ఇలాంటి కీలకమైన ప్రాంతంలో రోడ్డును ఆక్రమించి నిర్మాణాలు చేపట్టడం, షట్టర్ల ముందు రోడ్లపైనే వాహనాలు నిలపడం, వ్యాపారాలు నిర్వహించడంతో పాదచారులు, వాహనదారులు తీవ్ర ఇబ్బందులు పడుతున్నారు.
మురుగునీటి ముప్పు.. అధికారుల మౌనం వెనుక మర్మమేంటి?
రోడ్లతో పాటు మురుగునీటి కాల్వలను కూడా ఆక్రమించడంతో డ్రైనేజీ వ్యవస్థ పూర్తిగా అస్తవ్యస్తంగా తయారైంది. పీఎస్‌ఆర్‌ రోడ్డులో మురుగునీరు నిలిచిపోవడానికి, దుర్వాసన వెదజల్లుతుండడానికి ఈ కబ్జానే ప్రధాన కారణమని స్థానికులు ఆవేదన వ్యక్తం చేస్తున్నారు.
పారిశుధ్యానికి విఘాతం కలిగిస్తున్నా మున్సిపల్ అధికారులు స్పందించకపోవడంపై ప్రజలు తీవ్ర ఆగ్రహం వ్యక్తం చేస్తున్నారు.
ప్రజాప్రయోజనాల దృష్ట్యా అధికారులు తక్షణమే స్పందించాలి:
రాజకీయ పలుకుబడి ఎంత ఉన్నా, ఎవరి అండదండలు ఉన్నా ప్రజాధనానికి, ప్రభుత్వ స్థలాలకు విఘాతం కలిగిస్తే ఉపేక్షించేది లేదని అధికారులు నిరూపించాలి. హార్కర్‌ బావి సెంటర్‌లో ఆక్రమణలపై ఖమ్మం నగరపాలక సంస్థ (KMC) కమిషనర్ మరియు టౌన్‌ ప్లానింగ్‌ అధికారులు వెంటనే స్పందించి, తక్షణమే రీ-సర్వే నిర్వహించి.. అక్రమ నిర్మాణాలను కూల్చివేయాలని, బాధ్యులైన వారిపై చట్టపరమైన కఠిన చర్యలు తీసుకోవాలని ప్రజలు కోరుతున్నారు. లేనిపక్షంలో ప్రజాక్షేత్రంలో పెద్దఎత్తున ఉద్యమిస్తామని హెచ్చరిస్తున్నారు.