ములకలపల్లి (అశ్వారావుపేట), నవంబర్ 12 (పొలిటికల్ పవర్ – ఆర్సీ కారం వెంకటేష్):
విద్యుత్ వినియోగదారులకు నిరంతరాయంగా, నాణ్యమైన సేవలు అందించడంతో పాటు వారి సమస్యలను సత్వరమే పరిష్కరించడమే లక్ష్యంగా పనిచేస్తున్నామని వినియోగదారుల సమస్యల పరిష్కార వేదిక (సీజీఆర్ఎఫ్) ఛైర్మన్, టెక్నికల్ మెంబర్ కె.మాధవరావు స్పష్టం చేశారు. గురువారం ములకలపల్లి మండల కేంద్రంలోని విద్యుత్ సబ్‌స్టేషన్ ఆవరణలో నిర్వహించిన ప్రత్యేక సీజీఆర్ఎఫ్ వేదికకు ఆయన అధ్యక్షత వహించి మాట్లాడారు.
సమస్యల సత్వర పరిష్కారానికి ఆదేశాలు:
ఈ కార్యక్రమానికి ములకలపల్లి, పాల్వంచ మండలాల్లోని వివిధ గ్రామాల నుంచి వినియోగదారులు తరలివచ్చి తమ ఇబ్బందులను అధికారుల దృష్టికి తీసుకొచ్చారు. ప్రధానంగా విద్యుత్ బిల్లుల్లో హెచ్చుతగ్గులు, లోవోల్టేజీ, సరఫరాలో అంతరాయాలు, మీటర్ల సాంకేతిక లోపాలు, వ్యవసాయ సర్వీసుల కనెక్షన్లకు సంబంధించి మొత్తం మూడు ఫిర్యాదులు అందాయి. వేదిక వద్దే అర్జీలను స్వీకరించిన ఛైర్మన్ మాధవరావు, ఫైనాన్స్ మెంబర్ ఎస్.సత్యనారాయణలు సమస్యల తీవ్రతను అడిగి తెలుసుకున్నారు. క్షేత్రస్థాయిలో పరిశీలించి నిర్దేశిత గడువులోగా వాటిని పరిష్కరించాలని సంబంధిత అధికారులను ఆదేశించారు.
పాల్గొన్న అధికారులు:
ఈ కార్యక్రమంలో విద్యుత్ శాఖ ఎస్ఈ జి.మహేందర్, డీఈ జె.బద్రు పవార్, ఎస్ఏవో శ్రీధర్, ఏడీఈ కె.రాంప్రసాద్, ఏఈ బోయపాటి నరేష్, సబ్ ఇంజినీర్ సీహెచ్.శ్రీను, ఆయా గ్రామాల సర్పంచులు, వినియోగదారులు, సిబ్బంది తదితరులు పాల్గొన్నారు.