మామిడి, జీడి, పామాయిల్, పత్తి పంటలకు తీవ్ర నష్టం..
భద్రాద్రి కొత్తగూడెం జిల్లా దమ్మపేట మండలం జగ్గారం పంచాయతీ పరిధిలోని గుర్వాయిగూడెం గ్రామంలో టర్నడో బీభత్సం సృష్టించింది. బుధవారం రాత్రి సమయంలో ఒక్కసారిగా వీచిన బలమైన గాలులు, టర్నడో ప్రభావంతో గ్రామ పరిసర ప్రాంతాల్లోని పంట తోటలు తీవ్రంగా దెబ్బతిన్నాయి. మామిడి, జీడి, పామాయిల్ తోటలతో పాటు పత్తి పంటకు కూడా భారీగా నష్టం వాటిల్లినట్లు రైతులు చెబుతున్నారు.
అకస్మాత్తుగా వీచిన బలమైన గాలులకు పలుచోట్ల భారీ చెట్లు నేలకొరిగాయి. మామిడి, జీడి తోటల్లో కొమ్మలు విరిగిపడటంతో పాటు పామాయిల్ చెట్లు కూడా దెబ్బతిన్నాయి. పత్తి పంట సైతం గాలుల ధాటికి దెబ్బతిన్నట్లు రైతులు తెలిపారు.
ఏళ్ల తరబడి పంట తోటలను పెంచుకుంటూ జీవనం సాగిస్తున్న రైతులకు ఒక్కసారిగా వచ్చిన ప్రకృతి వైపరీత్యం తీవ్ర నష్టాన్ని మిగిల్చింది. పంట చేతికొచ్చే సమయంలో టర్నడో రూపంలో విరుచుకుపడటంతో రైతులు ఆవేదన వ్యక్తం చేస్తున్నారు
రాత్రి సమయంలో ఘటన చోటుచేసుకోవడంతో ప్రాణనష్టం తప్పిందని స్థానికులు చెబుతున్నారు. ఇదే ఘటన పగటి సమయంలో జరిగి ఉంటే పరిస్థితి మరింత తీవ్రంగా ఉండేదని గ్రామస్తులు ఆందోళన వ్యక్తం చేస్తున్నారు.
తమ పంటలకు జరిగిన నష్టాన్ని అధికారులు వెంటనే పరిశీలించాలని రైతులు కోరుతున్నారు. వ్యవసాయ, ఉద్యానవన శాఖ అధికారులు గ్రామంలో పర్యటించి ప్రతి పంటకు జరిగిన నష్టాన్ని శాస్త్రీయంగా అంచనా వేయాలని విజ్ఞప్తి చేస్తున్నారు.
ప్రకృతి వైపరీత్యంతో తీవ్రంగా నష్టపోయిన రైతులను ప్రభుత్వం ఆదుకోవాలని, ప్రభుత్వ నిబంధనల ప్రకారం అర్హత ఉన్న రైతులకు నష్టపరిహారం అందించాలని రైతులు కోరుతున్నారు. అధికారులు త్వరితగతిన నష్టం అంచనా వేసి ప్రభుత్వానికి నివేదిక అందించాలని విజ్ఞప్తి చేస్తున్నారు.