అక్టోబర్ 12 నుంచి గిరిప్రదక్షిణకు శ్రీకారం
వైరాగ్యగిరి ఆలయ అభివృద్ధికి అన్ని విధాలా సహకరిస్తాం
ఎమ్మెల్యే తూడి మేఘారెడ్డి
పొలిటికల్ పవర్ సమగ్ర జాతీయ తెలుగు దీనపత్రిక / పిఎన్9 టీవీ తెలుగు న్యూస్ వనపర్తి జిల్లా బ్యూరో సెప్టెంబర్ 27 2026: పెద్దమందడి మండలం పామిరెడ్డిపల్లి గ్రామంలోని మహిమాన్వితమైన శ్రీ వైరాగ్యగిరిశ్వర స్వామి ఆలయాన్ని మరింత అభివృద్ధి చేసి భక్తుల ఆధ్యాత్మిక కేంద్రంగా తీర్చిదిద్దేందుకు అన్ని విధాలా సహకరిస్తానని వనపర్తి శాసనసభ్యులు తూడి మేఘారెడ్డి తెలిపారు. ఆదివారం పామిరెడ్డిపల్లి గ్రామాన్ని సందర్శించిన ఎమ్మెల్యే మేఘారెడ్డి వైరాగ్యగిరి చుట్టూ గిరిప్రదక్షిణ కోసం అభివృద్ధి చేసిన మార్గాన్ని పరిశీలించారు. గ్రామస్తులు, ఆలయ కమిటీ సభ్యులు, గ్రామ సర్పంచ్తో కలిసి గిరిప్రదక్షిణ మార్గం అభివృద్ధి, భక్తులకు అవసరమైన సౌకర్యాలపై చర్చించారు. వైరాగ్యగిరి ఆలయానికి ఉన్న ఆధ్యాత్మిక ప్రాశస్త్యం, చారిత్రక నేపథ్యాన్ని దృష్టిలో ఉంచుకుని భవిష్యత్తులో ఆలయాన్ని మరింత అభివృద్ధి చేయాలన్న సంకల్పంతో ముందుకు సాగుతున్నామని చెప్పారు. అక్టోబర్ 12, 2026న గిరిప్రదక్షిణ మార్గ సంప్రోక్షణ కార్యక్రమాన్ని అంగరంగ వైభవంగా నిర్వహించనున్న నేపథ్యంలో ఏర్పాట్లను ముందుగానే పరిశీలించారు. వేదపండితుల సూచనలు, గ్రామస్తుల ఆకాంక్షలకు అనుగుణంగా కార్యక్రమాన్ని భక్తిశ్రద్ధలతో నిర్వహించాలన్నారు. గిరి ప్రదక్షణ మార్గంలో అవసరమైన మౌలిక సదుపాయాలు, భక్తులకు ఇబ్బందులు లేకుండా చూడాల్సిన అంశాలపై కూడా దృష్టి సారిస్తామని చెప్పారు. గతంలో కెనాల్ పనులు పూర్తయిన సందర్భంగా వచ్చిన తొలి నీటితో పరమశివుడికి అభిషేకం చేసిన విషయాన్ని గుర్తుచేసుకున్న ఎమ్మెల్యే, అప్పుడు ఇచ్చిన మాట ప్రకారం వైరాగ్యగిరిశ్వర స్వామి ఆలయ అభివృద్ధికి కట్టుబడి ఉన్నామని స్పష్టం చేశారు. అరుణాచలంలో నిర్వహించే గిరిప్రదక్షిణ తరహాలో పామిరెడ్డిపల్లి వైరాగ్యగిరి గిరిప్రదక్షిణ కూడా భక్తజనంతో కళకళలాడేలా అభివృద్ధి చెందాలని ఎమ్మెల్యే ఆకాంక్షించారు.