
హైదరాబాద్ / రంగారెడ్డి జిల్లా (పొలిటికల్ పవర్ న్యూస్):
అధికారాన్ని అడ్డుపెట్టుకుని అక్రమార్జనకు పాల్పడుతున్న అవినీతి అధికారులపై అవినీతి నిరోధక శాఖ (ఏసీబీ) ఉక్కుపాదం మోపుతోంది. ఆదాయానికి మించిన ఆస్తులు కూడబెట్టారన్న పక్కా సమాచారంతో రంగారెడ్డి జిల్లా మొయినాబాద్ టౌన్ ప్లానింగ్ ఆఫీసర్ (టీపీఓ) వాణి నివాసంలో ఏసీబీ అధికారులు మంగళవారం తెల్లవారుజాము నుంచే మెరుపు సోదాలు నిర్వహించారు.
రాజేంద్రనగర్ పరిధిలోని అత్తాపూర్లో ఉన్న ఆమె నివాసంలో ఏకకాలంలో తనిఖీలు చేపట్టిన అధికారులు, కీలక పత్రాలను స్వాధీనం చేసుకున్నట్లు తెలుస్తోంది.
గతంలోనూ రెడ్హ్యాండెడ్గా పట్టివేత..
సదరు అధికారిణి వాణిపై అవినీతి ఆరోపణలు రావడం ఇదే మొదటిసారి కాదు. సరిగ్గా రెండు నెలల క్రితమే ఓ పని నిమిత్తం లంచం తీసుకుంటూ ఏసీబీ అధికారులకు రెడ్హ్యాండెడ్గా పట్టుబడ్డారు. నాటి కేసు విచారణలో భాగంగా ఆమె అక్రమ సంపాదనపై అధికారులకు కీలక ఆధారాలు లభించడంతో, తాజాగా ఆదాయానికి మించిన ఆస్తుల (డీఏ) కేసు నమోదు చేసి లోతైన దర్యాప్తు ప్రారంభించారు.
అక్రమార్జన చిట్టాపై ఏసీబీ ఆరా..
ప్రస్తుతం కొనసాగుతున్న సోదాల్లో భాగంగా వాణి, ఆమె కుటుంబ సభ్యుల పేరిట ఉన్న స్థిరాస్తులు, ఖరీదైన ప్లాట్లు, బ్యాంకు ఖాతాలు, లాకర్లు మరియు ఇతర ఆర్థిక లావాదేవీలకు సంబంధించిన డాక్యుమెంట్లను ఏసీబీ బృందాలు క్షుణ్ణంగా పరిశీలిస్తున్నాయి.
ప్రజలకు సేవ చేయాల్సిన ప్రభుత్వ అధికారులే లంచాలకు మరిగి కోట్ల రూపాయల ఆస్తులు కూడబెట్టడంపై సర్వత్రా విమర్శలు వ్యక్తమవుతున్నాయి. ఈ తనిఖీలు పూర్తయిన తర్వాత ఆమె అక్రమార్జన విలువ ఎంతనేది ఏసీబీ అధికారులు అధికారికంగా వెల్లడించనున్నారు.
(వార్త సేకరణ: యర్ర నాగరాజు రెడ్డి – పొలిటికల్ పవర్ సమగ్ర జాతీయ తెలుగు దినపత్రిక / పిఎన్9 టీవీ తెలుగు న్యూస్)

