నంద్యాల జిల్లా, శ్రీశైలం (నవంబర్ 16):
ద్వాదశ జ్యోతిర్లింగ క్షేత్రమైన శ్రీశైలం శ్రీ భ్రమరాంబ మల్లికార్జున స్వామి దేవస్థానంలో నిత్యం జరిగే అన్నప్రసాద వితరణ కార్యక్రమానికి దాతలు తమ ఉదారతను చాటుకున్నారు. కర్నూలుకు చెందిన శ్రీ ఆర్. తేజేశ్వర్, హైదరాబాద్కు చెందిన శ్రీ కె. నరేంద్రరెడ్డి మరియు శ్రీ ఎం. చంద్రశేఖరగౌడ్ కలిసి భక్తుల భోజన అవసరాల నిమిత్తం భారీ స్థాయిలో పచ్చళ్లను విరాళంగా సమర్పించారు.
దేవస్థానం వర్గాలు మరియు దాతలు అందించిన వివరాల ప్రకారం, అన్నప్రసాద వితరణలో భక్తులకు వడ్డించేందుకు వీలుగా 500 కేజీల పండుమిర్చి పచ్చడి, 1000 కేజీల మామిడికాయ పచ్చడిని (మొత్తం 1,500 కేజీలు) అందజేశారు. ఈ పచ్చళ్ల విలువ సుమారు రూ. 3.60 లక్షల వరకు ఉంటుందని దాతలు పేర్కొన్నారు. దూర ప్రాంతాల నుండి వచ్చే భక్తుల ఆకలి తీర్చే అన్నదాన కార్యక్రమంలో భాగస్వాములు కావడం పట్ల దాతలు సంతృప్తి వ్యక్తం చేశారు.
దాతల సేవానిరతిని దేవస్థానం అధికారులు అభినందించారు. ఈ విరాళం అందజేత కార్యక్రమంలో దేవస్థానం అన్నప్రసాద వితరణ సహాయ కార్యనిర్వహణాధికారి ఎం. హరియానాయక్, పర్యవేక్షకులు సి.హెచ్. కోమలి, అన్నప్రసాద వితరణ గుమాస్తా ఎం. చంద్రశేఖరరెడ్డి తదితర సిబ్బంది పాల్గొన్నారు.


