తెలంగాణలో పెండింగ్‌లో ఉన్న ఫీజు రీయింబర్స్‌మెంట్‌ బకాయిలను ప్రభుత్వం తక్షణమే విడుదల చేయాలని అశ్వారావుపేట తెలుగుదేశం పార్టీ ఇన్‌చార్జ్‌ కట్రం స్వామిదొర డిమాండ్‌ చేశారు.
ఫీజు రీయింబర్స్‌మెంట్‌ సకాలంలో అందకపోవడంతో అనేక మంది విద్యార్థులు తమ సర్టిఫికెట్లు పొందలేక, ఉద్యోగాలకు దరఖాస్తు చేసుకునే అవకాశాలను కోల్పోతున్నారని ఆవేదన వ్యక్తం చేశారు. చదువుకొని ఉద్యోగాలు సాధిస్తారని ఆశించిన తల్లిదండ్రులు సైతం తీవ్ర నిరాశకు గురవుతున్నారని పేర్కొన్నారు.
ఉన్నత చదువులు పూర్తి చేసినప్పటికీ ఫీజు బకాయిల కారణంగా సర్టిఫికెట్లు అందక విద్యార్థులు ఇబ్బందులు పడుతున్నారని తెలిపారు. ప్రభుత్వం వెంటనే స్పందించి పెండింగ్‌ ఫీజు రీయింబర్స్‌మెంట్‌ నిధులను విడుదల చేసి, విద్యార్థుల భవిష్యత్తుకు భరోసా కల్పించాలని కట్రం స్వామిదొర కోరారు.