రూ.1.29 లక్షలు రికవరీ.. ఇంకా రూ.3 లక్షలు రావాల్సిందే!
బాధ్యులపై చర్యలు తీసుకోవాలి – ఆర్టీఐ యాక్టివిటీ ఫోరం జిల్లా అధ్యక్షుడు మంగరాయి వెంకటేష్
పొలిటికల్ పవర్ సమగ్ర జాతీయ తెలుగు దీనపత్రిక / పిఎన్9 టీవీ తెలుగు న్యూస్ తెలంగాణ రాష్ట్ర బ్యూరో బాజ శేఖర్ అక్టోబర్ 30 2026: మహబూబ్‌నగర్ జిల్లా: అడ్డాకుల మండలం వర్ని గ్రామంలో మహిళా సంఘాల నిధుల దుర్వినియోగం వ్యవహారంపై చేపట్టిన ఆర్టీఐ పోరాటం ఫలితాన్నిచ్చింది. సమాచార హక్కు చట్టం ద్వారా సేకరించిన వివరాలు, జిల్లా కలెక్టర్‌కు చేసిన ఫిర్యాదు ఫలితంగా రూ.1,29,000లు రికవరీ చేసి మహిళా సంఘం ఖాతాలో జమ చేసినట్లు ఆర్టీఐ యాక్టివిటీ ఫోరం జిల్లా అధ్యక్షుడు మంగరాయి వెంకటేష్ వెల్లడించారు. మహిళా సంఘాల నిధుల్లో అవకతవకలు జరిగాయన్న ఆరోపణలపై వర్ని గ్రామానికి చెందిన యువకులు మంద నవీన్ కుమార్ తదితరులు ఆర్టీఐ ద్వారా వివరాలు సేకరించి జిల్లా కలెక్టర్‌కు ఫిర్యాదు చేశారు. ఈ వ్యవహారంపై స్పందించిన సెర్ప్ (పేదరిక నిర్మూలన సంస్థ) ఉన్నతాధికారులు విచారణకు ఆదేశించారు. విచారణ అనంతరం రూ.1.29 లక్షలను మహిళా సంఘం ఖాతాలో జమ చేయించినట్లు తెలిపారు. అయితే ఇంకా సుమారు రూ.3 లక్షల నిధులు రికవరీ కావాల్సి ఉందని, ఆ మొత్తాన్ని కూడా తక్షణమే మహిళా సంఘాల ఖాతాల్లో జమ చేయించాలని వెంకటేష్ డిమాండ్ చేశారు. నిధుల దుర్వినియోగానికి బాధ్యులుగా ఆరోపణలు ఎదుర్కొంటున్న గ్రామ సంఘ సహాయకురాలిపై (వీఓఏ) నిబంధనల ప్రకారం చర్యలు తీసుకోవాలని, అవసరమైన చట్టపరమైన చర్యలు చేపట్టాలని కోరారు. అదేవిధంగా కమ్యూనిటీ కో-ఆర్డినేటర్ యాదగిరి బదిలీ వ్యవహారంపై సమగ్ర విచారణ జరిపించాలని డిమాండ్ చేశారు. మహిళా సంఘాల సొమ్ముకు పూర్తి రక్షణ కల్పించి, మిగిలిన నిధులను కూడా రికవరీ చేసే వరకు తమ పోరాటం కొనసాగుతుందని మంగరాయి వెంకటేష్ స్పష్టం చేశారు.