మోజర్లలో సందడిగా అక్షరాభ్యాసం.. అన్నప్రాసన

📰 Generate e-Paper Clip

తల్లీబిడ్డల ఆరోగ్యంపై అవగాహన కల్పించిన అంగన్‌వాడీ సిబ్బందిపొలిటికల్ పవర్ సమగ్ర జాతీయ తెలుగు దీనపత్రిక / పిఎన్9 టీవీ తెలుగు న్యూస్ వనపర్తి జిల్లా బ్యూరో సెప్టెంబర్ 20 2026: పెద్దమందడి మండలం మోజర్ల గ్రామంలోని అంగన్‌వాడీ కేంద్రంలో అక్షరాభ్యాసం, అన్నప్రాసన కార్యక్రమాలను ఘనంగా నిర్వహించారు. ఈ కార్యక్రమానికి గ్రామ సర్పంచ్ కె. చంద్రశేఖర్, ఉపసర్పంచ్ ఆర్. రాములు, సూపర్‌వైజర్ సుధా, ప్రాథమిక పాఠశాల ఉపాధ్యాయుడు యుగంధర్, అంగన్‌వాడీ టీచర్లు శారద, సువర్ణ, ఆశా కార్యకర్తలు, ఏఎన్‌ఎం, గర్భిణులు, బాలింతలు, తల్లులు పాల్గొన్నారు. ఈ సందర్భంగా చిన్నారులకు సంప్రదాయబద్ధంగా అన్నప్రాసన నిర్వహించి, అక్షరాభ్యాసం చేయించారు.బాలామృతంతో వివిధ రకాల పిండివంటలు, పోషకాహార పదార్థాలను తయారు చేసుకోవచ్చని సిబ్బంది తల్లులకు ప్రత్యక్షంగా తయారు చేసి చూపించారు. అంగన్‌వాడీ కేంద్రంలో అందించే ఒకపూట సంపూర్ణ భోజనాన్ని గర్భిణులు, బాలింతలు తప్పనిసరిగా వినియోగించుకోవాలని సర్పంచ్ చంద్రశేఖర్ సూచించారు. తల్లులు తమ ఆరోగ్యంతో పాటు చిన్నారుల ఆరోగ్యంపై ప్రత్యేక శ్రద్ధ వహించాలని ఆయన కోరారు. సూపర్‌వైజర్ సుధా మాట్లాడుతూ… గర్భిణులు, బాలింతలు తీసుకోవాల్సిన పౌష్టికాహారం గురించి వివరించారు. అదేవిధంగా రక్తహీనత నివారణకు అవసరమైన ఆహార పదార్థాలు, పోషక విలువలపై తల్లులకు అవగాహన కల్పించారు. బాలామృతం, అంగన్‌వాడీ ద్వారా అందించే పౌష్టికాహారాన్ని సద్వినియోగం చేసుకుని తల్లి, బిడ్డలు ఆరోగ్యంగా ఉండేలా చూసుకోవాలని సిబ్బంది సూచించారు. ఈ కార్యక్రమంలో పాల్గొన్న తల్లులు, గర్భిణులు, బాలింతలు అంగన్‌వాడీ సిబ్బంది నిర్వహించిన అవగాహన కార్యక్రమాన్ని అభినందించారు.