పంట చేతికొచ్చే సమయంలో ఆర్నబ్ తుఫాన్ రైతులకు తీరని నష్టం..
జూలూరుపాడు అక్టోబర్28: పొలిటికల్ పవర్ సమగ్ర జాతీయ తెలుగు దినపత్రిక పిన్9 తెలుగు న్యూస్: భద్రాద్రి కొత్తగూడెం జిల్లా జూలూరుపాడు మండలంలో అకాల వర్షాలు పత్తి రైతులను తీవ్ర ఆందోళనకు గురిచేస్తున్నాయి. మండల పరిధిలోని అధిక శాతం మంది రైతులు పత్తి, వరి, మిర్చి పంటలను సాగు చేస్తున్నారు. ఈ ఏడాది కూడా పెద్ద ఎత్తున పత్తి, మిర్చి పంటలను సాగు చేసిన రైతులకు అకాల వర్షాలు తీవ్ర నష్టాన్ని కలిగిస్తున్నాయి.
పత్తి చేతికి వచ్చే సమయంలో వర్షాలు కురవడంతో పత్తి తీయకముందే తడిసి నల్లబడుతోంది. దీంతో పత్తి నాణ్యత దెబ్బతినడంతో పాటు ఆశించిన ధర లభించకపోవచ్చని రైతులు ఆవేదన వ్యక్తం చేస్తున్నారు. ఇప్పటికే సాగు కోసం పెట్టుబడులు పెట్టిన రైతులు, అకాల వర్షాల కారణంగా నష్టాలు చవిచూడాల్సి వస్తోందని వాపోతున్నారు.
ప్రభుత్వం స్పందించాలి.. రైతులను ఆదుకోవాలి
అకాల వర్షాలతో నష్టపోతున్న పత్తి రైతులను ప్రభుత్వం ఆదుకోవాలని రైతులు కోరుతున్నారు. పంట నష్టాన్ని అధికారులు క్షేత్రస్థాయిలో పరిశీలించి, బాధిత రైతులకు తగిన పరిహారం అందించాలని విజ్ఞప్తి చేస్తున్నారు. జూలూరుపాడు మండలాన్ని కరువు ప్రభావిత ప్రాంతాల జాబితాలో పరిగణనలోకి తీసుకోకపోవడంపై పలువురు రైతులు అసంతృప్తి వ్యక్తం చేస్తున్నారు.
ప్రభుత్వం వెంటనే స్పందించి పంట నష్టంపై సమగ్ర సర్వే నిర్వహించి, నష్టపోయిన రైతులకు న్యాయం చేయాలని రైతులు డిమాండ్ చేస్తున్నారు.