వరద ఉధృతికి దెబ్బతిన్న రింగ్‌బండ్‌.. పరిసర గ్రామాల ప్రజల్లో ఆందోళన
పొలిటికల్ పవర్,అశ్వారావుపేట ఆర్సి ఇంచార్జ్ ఎం. నాగార్జున, నవంబర్ 4: భద్రాద్రి కొత్తగూడెం జిల్లా అశ్వారావుపేట మండలంలోని పెద్దవాగు ప్రాజెక్టు వద్ద భారీ వర్షాలు, వరద ఉధృతి కారణంగా రింగ్‌బండ్‌ దెబ్బతిని తెగిపోయింది. వరద నీటి ప్రవాహానికి రింగ్‌బండ్‌కు గండి పడటంతో ప్రాజెక్టు పరిసర ప్రాంతాల ప్రజల్లో ఆందోళన నెలకొంది.
రింగ్‌బండ్‌ తెగిపోవడంతో పరిసర ప్రాంతాల్లో వరద పరిస్థితులపై స్థానికులు ఆందోళన వ్యక్తం చేస్తున్నారు. వరద ప్రవాహాన్ని గమనిస్తూ అప్రమత్తంగా ఉంటున్నారు. మరోవైపు వరద ప్రభావిత ప్రాంతాల్లో అధికారులు పర్యవేక్షణ చేపట్టి పరిస్థితిని ఎప్పటికప్పుడు సమీక్షిస్తున్నారు.
ప్రాజెక్టు పరిసర గ్రామాల ప్రజలు అప్రమత్తంగా ఉండాలని అధికారులు సూచిస్తున్నారు. వరద నీరు ప్రవహిస్తున్న ప్రాంతాలకు వెళ్లవద్దని, నీటి ప్రవాహాన్ని దాటేందుకు ప్రయత్నించవద్దని హెచ్చరిస్తున్నారు. ఎలాంటి ప్రమాదాలు జరగకుండా ప్రజలు జాగ్రత్తలు పాటించాలని కోరుతున్నారు.