పొలిటికల్ పవర్ సామాగ్ర జాతీయ తెలుగు దీనపత్రిక / పిఎన్9 టీవీ తెలుగు న్యూస్ తెలంగాణ స్టేట్ బ్యూరో బాజ శేఖర్ హైదరాబాద్, జూలై 30 2026: రాష్ట్రంలో ఎల్నినో ప్రభావం, వర్షాభావ పరిస్థితులను దృష్టిలో ఉంచుకుని ఆరుతడి పంటలు, ముఖ్యంగా కూరగాయల సాగును విస్తృతంగా ప్రోత్సహించాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. రైతులకు అవసరమైన విత్తనాలను సబ్సిడీపై అందించేందుకు ప్రభుత్వం సిద్ధంగా ఉందని ఆయన స్పష్టం చేశారు. రాష్ట్ర ప్రణాళిక సంఘం వైస్ చైర్మన్ జి. చిన్నా రెడ్డి నేతృత్వంలోని నిపుణుల కమిటీ రూపొందించిన ఎల్నినో ప్రభావం, వర్షాభావ పరిస్థితులపై నివేదికను ఎంసీఆర్ హెచ్ఆర్డీలోని బోధి పెవిలియన్లో ముఖ్యమంత్రికి అందజేశారు. ఈ సందర్భంగా ముఖ్యమంత్రి మాట్లాడుతూ… ప్రభుత్వ పాఠశాలల్లో విద్యార్థులకు అందించే బ్రేక్ఫాస్ట్, మధ్యాహ్న భోజన కార్యక్రమాలకు అనుసంధానంగా నిర్మిస్తున్న సెంట్రలైజ్డ్ కిచెన్ల పరిసర ప్రాంతాల్లో కూరగాయల సాగుపై ప్రత్యేక దృష్టి పెట్టాలని సూచించారు. ఆర్గానిక్ విధానంలో కూరగాయలు, ఇతర పంటలను సాగు చేసేలా రైతులకు అవగాహన కల్పించాలని, రైతులు పండించిన ఉత్పత్తులను ప్రభుత్వం నేరుగా కొనుగోలు చేసే విధానాన్ని రూపొందించాలని అధికారులకు ఆదేశించారు. వ్యవసాయ శాఖ ఎక్స్టెన్షన్ అధికారుల ద్వారా రైతులకు శిక్షణ, సాంకేతిక సూచనలు అందించాలని, ఎల్నినో ప్రభావంతో తగ్గిన సాగు విస్తీర్ణం నేపథ్యంలో ప్రత్యామ్నాయ పంటల సాగును ప్రోత్సహించే అత్యవసర కార్యాచరణ ప్రణాళికలను గ్రామాల వారీగా రూపొందించాలని కమిటీ నివేదిక సూచించింది. అలాగే పప్పుధాన్యాలు, నూనె గింజలు, చిరుధాన్యాలు, కూరగాయల సాగును ప్రోత్సహిస్తూ 75 శాతం సబ్సిడీతో విత్తనాలు అందించాలని, ప్రత్యామ్నాయ పంటలకు కొత్త రుణాలు మంజూరు చేయాలని కమిటీ సిఫారసు చేసింది. వ్యవసాయ విశ్వవిద్యాలయాల శాస్త్రవేత్తల ద్వారా రైతులకు సాంకేతిక మార్గదర్శకాలు అందించాలని, హైదరాబాద్ పరిసర ప్రాంతాల్లో కూరగాయల సాగును పెంచి రైతు బజార్లకు రవాణా సౌకర్యాలు కల్పించాలని నివేదికలో పేర్కొన్నారు. గ్రామీణ ప్రాంతాల్లో డైరీ యూనిట్ల స్థాపనకు ఆర్థిక సహాయం అందించడంతో పాటు, అత్యవసర చర్యల అమలును పర్యవేక్షించేందుకు గ్రామస్థాయి బృందాలను ఏర్పాటు చేయాలని కమిటీ సూచించింది.
ఆరుతడి పంటలు, కూరగాయల సాగుకు ప్రాధాన్యం – సీఎం రేవంత్ రెడ్డి
