వృద్ధుల ముసుగులో గంజాయి రవాణా.. ఐదుగురు అరెస్ట్
హైదరాబాద్లో 38 కిలోల డ్రై గంజాయి స్వాధీనం.. విలువ రూ.10 లక్షలు
పొలిటికల్ పవర్ పిన్ 9 టీవీ తెలంగాణ స్టేట్ బ్యూరో సతీష్
హైదరాబాద్, ఆగస్టు 22: వయసు పైబడిన ప్రయాణికులపై సాధారణంగా అనుమానం తక్కువగా ఉంటుందనే విషయాన్ని ఆసరాగా చేసుకుని గంజాయిని రవాణా చేస్తున్న ఐదుగురిని హైదరాబాద్ సీసీఎస్ ప్రత్యేక క్రైమ్ టీమ్, గాంధీనగర్ పోలీసులు సంయుక్తంగా పట్టుకున్నారు. వారి నుంచి సుమారు 38 కిలోల డ్రై గంజాయిని, దీని విలువ దాదాపు రూ.10 లక్షలు ఉంటుందని పోలీసులు తెలిపారు. ఆగస్టు 21న విశ్వసనీయ సమాచారం అందడంతో సీసీఎస్ క్రైమ్ టీమ్, గాంధీనగర్ పోలీసులతో కలిసి దాడి చేసి నిందితులను అదుపులోకి తీసుకుంది. అరెస్టైన వారిలో రాజారాం స్వామి కన్ను పడయాచి (78), సంతోష్ బాలారం ప్రజాపతి (65), విజయలక్ష్మి కలియమూర్తి పిల్లై (66), సిల్మినా కుజూర్ (36), షీలా దేవి (48) ఉన్నారు. వీరిలో కొందరు కూలీలు, మరికొందరు గృహ సహాయకులుగా పనిచేస్తున్నట్లు పోలీసులు వెల్లడించారు.
అరకు నుంచి హైదరాబాద్ మీదుగా ముంబైకి..
పోలీసుల వివరాల ప్రకారం.. నిందితులు విశాఖపట్నం జిల్లా అరకు ప్రాంతం నుంచి పెద్ద మొత్తంలో గంజాయిని సేకరించి, బ్రౌన్ కలర్ పార్సిల్ కవర్లలో ప్యాక్ చేసేవారు. అనంతరం బస్సుల్లో గంజాయి పార్సిళ్లను హైదరాబాద్కు తరలించి, ఇక్కడ మరో బస్సు ఎక్కి ముంబైకి వెళ్లేవారు. అక్కడ ముందుగా సూచించిన ప్రాంతాల్లో గంజాయి పార్సిళ్లను అప్పగించేవారు.
వయసును అడ్డుపెట్టుకుని..
వృద్ధ ప్రయాణికులపై అనుమానం తక్కువగా ఉంటుందనే విషయాన్ని అక్రమ రవాణా నిర్వాహకులు తమకు అనుకూలంగా ఉపయోగించుకున్నట్లు పోలీసులు గుర్తించారు. నిందితులు అరకు నుంచి బయలుదేరే సమయంలో పార్సిళ్లను తమ సాధారణ సామాన్లతో కలిపి తీసుకెళ్లేవారు. అనుమానం రాకుండా హైదరాబాద్ చేరుకున్న తర్వాత కొంతసేపు వేరే లాడ్జిలో బస చేసి, ముందుగా నిర్ణయించిన మరో బస్సులో ముంబైకి వెళ్లేవారని పోలీసులు తెలిపారు.
ప్రతి డెలివరీకి నిందితులకు సుమారు రూ.10 వేల నుంచి రూ.12 వేల వరకు కమీషన్ చెల్లించేవారని ప్రాథమిక దర్యాప్తులో వెల్లడైంది.
గతంలోనూ గంజాయి రవాణా?
అరెస్టైన నిందితులకు గతంలోనూ గంజాయి రవాణాకు సంబంధించిన నేర చరిత్ర ఉన్నట్లు పోలీసులు తెలిపారు. ఈ వ్యవహారం వెనుక ఉన్న ప్రధాన వ్యక్తి ఎవరు? అరకు నుంచి గంజాయిని సరఫరా చేస్తున్న నెట్వర్క్ ఎంత విస్తరించింది? ముంబైలో పార్సిళ్లను స్వీకరిస్తున్న వ్యక్తులు ఎవరు? అనే కోణాల్లో దర్యాప్తు కొనసాగుతోంది.
ఈ ఆపరేషన్ను సీసీఎస్ క్రైమ్ టీమ్ ఇన్స్పెక్టర్ చి. సుధాకర్ రావు, ఎస్ఐ ఎన్. గౌరేందర్ గౌడ్ తమ సిబ్బందితో కలిసి గాంధీనగర్ పోలీసుల సమన్వయంతో నిర్వహించారు. డీసీపీ, సీసీఎస్ ఎస్. చైతన్య కుమార్, ఐపీఎస్ మార్గదర్శకత్వంలో ఈ చర్యలు చేపట్టినట్లు పోలీసులు తెలిపారు.
ప్రజలకు పోలీసుల హెచ్చరిక
గంజాయి, ఇతర మాదకద్రవ్యాల అక్రమ రవాణా, నిల్వ, విక్రయం లేదా పంపిణీలో ఎవరూ భాగస్వాములు కావొద్దని హైదరాబాద్ పోలీసులు హెచ్చరించారు. డబ్బు కోసం క్యారియర్లుగా వ్యవహరించినా ఎన్డీపీఎస్ చట్టం కింద కఠిన చర్యలు తప్పవని స్పష్టం చేశారు. మాదకద్రవ్యాల అక్రమ రవాణాపై నిఘాను మరింత పెంచి, నెట్వర్క్లోని ఇతర వ్యక్తులను కూడా గుర్తించి చర్యలు తీసుకుంటామని పోలీసులు వెల్లడించారు.