పంట నష్టంపై తక్షణ సర్వే చేపట్టి పరిహారం అందించాలి
పొలిటికల్ పవర్, అశ్వారావుపేట ఆర్సి ఇంచార్జ్ ఎం. నాగార్జున, దమ్మపేట, నవంబర్ 4: దమ్మపేట మండలంలో రెండు రోజులుగా కురిసిన భారీ వర్షాల కారణంగా రైతాంగం తీవ్రంగా నష్టపోయిందని, ప్రభుత్వం వెంటనే స్పందించి బాధిత రైతులను ఆదుకోవాలని అఖిల భారత ఐక్య రైతు సంఘం (ఏఐయూకేఎస్‌) భద్రాద్రి కొత్తగూడెం జిల్లా ప్రధాన కార్యదర్శి అమర్లపూడి రాము డిమాండ్ చేశారు.
భారీ వర్షాల ప్రభావంతో వరి, మొక్కజొన్న, మిర్చి, పత్తి, అరటి తదితర పంటలు దెబ్బతిన్నాయని ఆయన తెలిపారు. ఇప్పటికే పెట్టుబడులు పెట్టి పంటలపై ఆశలు పెట్టుకున్న రైతులు వర్షాల కారణంగా తీవ్ర నష్టాలను ఎదుర్కొంటున్నారని ఆవేదన వ్యక్తం చేశారు. వ్యవసాయ శాఖ అధికారులు వెంటనే క్షేత్రస్థాయిలో పర్యటించి పంట నష్టాన్ని అంచనా వేయాలని, నష్టపోయిన ప్రతి రైతు వివరాలను నమోదు చేసి ప్రభుత్వానికి నివేదిక అందించాలని కోరారు. పంట నష్టంపై తక్షణమే అధికారిక ప్రకటన చేసి అర్హులైన రైతులకు నష్టపరిహారం అందించాలని ప్రభుత్వాన్ని డిమాండ్ చేశారు.
పంటల నష్టంతో పాటు గ్రామాల్లో వర్షాలకు పూరిళ్లు దెబ్బతిని నిరుపేద కుటుంబాలు ఇబ్బందులు పడుతున్నాయని రాము పేర్కొన్నారు. దెబ్బతిన్న ఇళ్లను పరిశీలించి బాధితులకు ఇందిరమ్మ ఇళ్లు మంజూరు చేయాలని కోరారు. అలాగే వర్షాల కారణంగా గ్రామాల్లో పారిశుద్ధ్య సమస్యలు తలెత్తకుండా ప్రత్యేక పారిశుద్ధ్య కార్యక్రమాలు చేపట్టాలని సూచించారు.
దమ్మపేట మోడల్ కాలనీ నీట మునిగిన నేపథ్యంలో అక్కడ తక్షణమే సహాయక చర్యలు చేపట్టి, వరద నీటిని తొలగించేలా అధికారులు చర్యలు తీసుకోవాలని డిమాండ్ చేశారు. రైతులు, పేద కుటుంబాలు ఎదుర్కొంటున్న సమస్యలపై ప్రభుత్వం నిర్లక్ష్యం చేయకుండా వెంటనే స్పందించి అవసరమైన సహాయం అందించాలని అమర్లపూడి రాము కోరారు.