జూలూరుపాడు/అనంతారం (పొలిటికల్ పవర్ సమాగ్ర జాతీయ తెలుగు దినపత్రిక):
మురసు తీవ్ర తుఫాన్ ప్రభావంతో ఉమ్మడి ఖమ్మం జిల్లా వ్యాప్తంగా ఈదురుగాలులతో కూడిన కుండపోత వర్షాలు విధ్వంసం సృష్టించాయి. ముఖ్యంగా భద్రాద్రి కొత్తగూడెం జిల్లా జూలూరుపాడు మండలం అనంతారం గ్రామంలో తుఫాన్ ధాటికి చేతికందిన పంటలన్నీ నేలమట్టమై తీవ్ర నష్టం వాటిల్లడంతో రైతన్నలు తీవ్ర ఆవేదన వ్యక్తం చేస్తున్నారు.
వరి, పత్తి, మిరప తదితర పంటలు నీట మునిగి ఊడ్చుకుపోవడంతో కన్నీరుమున్నీరవుతున్నారు. ఈ సందర్భంగా అనంతారం గ్రామ ప్రజలు బోరున విలపిస్తూ.. “తీవ్ర శ్రమకోర్చి సాగు చేసిన పంటలు కళ్ల ముందే నాశనమయ్యాయని, తాము తీవ్ర ఆర్థిక సంక్షోభంలో కూరుకుపోయామని” వాపోయారు. ఎటు చూసినా విరుచుకుపడిన గాలిదుమారానికి పెద్ద ఎత్తున చెట్లు కూలిపడి ప్రధాన రహదారులపై రాకపోకలు పూర్తిగా స్తంభించిపోయాయి.
తక్షణమే న్యాయం చేయాలి..
ఈ తీవ్ర సంక్షోభ పరిస్థితులపై జిల్లా అధికారులు వెంటనే స్పందించి క్షేత్రస్థాయిలో పూర్తి దర్యాప్తు నిర్వహించాలని, దెబ్బతిన్న పంట నష్ట పరిహారాన్ని అంచనా వేసి తమకు తగిన న్యాయం చేయాలని స్థానిక ప్రజలు, రైతులు ప్రభుత్వాన్ని ఘాటుగా డిమాండ్ చేస్తున్నారు. మురసు తుఫాన్ కాటేసిన నేపథ్యంలో జూలూరుపాడు మండలాన్ని వెంటనే ‘కరువు మండలం’గా ప్రకటించి, బాధితులను అన్ని విధాలా ఆదుకోవాలని వారు వేడుకుంటున్నారు.