పొలిటికల్ పవర్ సమగ్ర జాతీయ తెలుగు దినపత్రిక పిఎన్9 టీవీ తెలుగు న్యూస్ ఖమ్మం జిల్లా ప్రతినిధి ప్రియమైన ఖమ్మం జిల్లా బంజారా సోదరి సోదర మణులకు నమస్కరించి వ్రాయునది ఏమనగా… నేడు మనం నివసిస్తున్న ఖమ్మం ప్రాంతానికి చరిత్రలో అనేక పేర్లు ఉన్నాయి. మన బంజారా పెద్దలు ఈ ప్రాంతాన్ని తమ స్థానిక భాషా పలుకుబడిలో “ఖామ్మేట్” అని పిలిచేవారని మన పెద్దల నుంచి తరతరాలుగా వినిపిస్తూ వచ్చింది. మన పెద్దలు ఉపయోగించిన ఈ “ఖామ్మేట్” అనే పేరు కేవలం ఒక పదం కాదు. అది మన ప్రాంతంతో మన బంజారా సమాజానికి ఉన్న అనుబంధాన్ని, మన పెద్దల జ్ఞాపకాలను, మన భాషా పలుకుబడిని గుర్తుచేసే ఒక చారిత్రక గుర్తింపు.
ఖమ్మం పేరుకు చారిత్రక నేపథ్యం
ఖమ్మం ప్రాంతానికి సంబంధించిన అధికారిక చరిత్రలో ఈ ప్రాంతం గతంలో స్తంభాద్రి పేరుతో కూడా ప్రసిద్ధి చెందినట్లు పేర్కొనబడింది. కాలక్రమంలో కంబం, కంబమేట్టు, ఖమ్మం మెట్, ఖమ్మం వంటి పేర్ల పరిణామం గురించి చారిత్రక ఆధారాలు ఉన్నాయి. మన బంజారా సమాజంలో మాత్రం పెద్దలు స్థానిక పలుకుబడిలో “ఖామ్మేట్” అని పిలిచే సంప్రదాయం ఉన్నట్లు మన పెద్దల జ్ఞాపకాలలో కనిపిస్తుంది. అందుకే మనం “ఖామ్మేట్” అనే పేరును మన బంజారా సంస్కృతి, స్థానిక చరిత్రకు సంబంధించిన ఒక జ్ఞాపకంగా గౌరవంగా గుర్తుచేసుకోవాలి.
ఖమ్మం జిల్లా ఆవిర్భావం
ఖమ్మం ప్రాంతం ఒకప్పుడు వరంగల్ జిల్లా పరిపాలనా పరిధిలో ఉండేది. 1953 అక్టోబర్ 1వ తేదీన అప్పటి వరంగల్ జిల్లాలోని ఖమ్మం, మధిర, పాల్వంచ, బూర్గంపాడు, యెల్లందు ప్రాంతాలను కలిపి ఖమ్మం జిల్లాను ప్రత్యేక జిల్లాగా ఏర్పాటు చేశారు. తరువాత పరిపాలనా మార్పుల్లో మరికొన్ని ప్రాంతాలు ఖమ్మం జిల్లాలో చేరాయి. 1959లో భద్రాచలం ప్రాంతం కూడా ఖమ్మం జిల్లాలోకి వచ్చింది. 1985లో మండల వ్యవస్థ ప్రవేశపెట్టడంతో ఖమ్మం జిల్లాలో పరిపాలనా విభజనలు జరిగాయి. 2 జూన్ 2014న తెలంగాణ రాష్ట్రం ఏర్పడిన తరువాత ఖమ్మం జిల్లా తెలంగాణలో భాగమైంది. 11 అక్టోబర్ 2016న తెలంగాణలో కొత్త జిల్లాల ఏర్పాటు సందర్భంగా పాత ఖమ్మం జిల్లా పునర్వ్యవస్థీకరించబడింది. దాంతో ప్రస్తుత ఖమ్మం జిల్లా మరియు భద్రాద్రి కొత్తగూడెం జిల్లా వంటి కొత్త పరిపాలనా జిల్లాలు ఏర్పడ్డాయి.
మన బంజారా గుర్తింపు
ఖమ్మం జిల్లాలో బంజారా సమాజానికి ప్రత్యేకమైన చరిత్ర, సంస్కృతి, భాష, ఆచారాలు, సంప్రదాయాలు ఉన్నాయి. మన తండాలు, మన పెద్దలు, మన బంజారా జీవన విధానం ఈ ప్రాంత చరిత్రలో ఒక భాగం. అందువల్ల మన పెద్దలు ఉపయోగించిన “ఖామ్మేట్” అనే స్థానిక పేరు కూడా మనకు ఒక జ్ఞాపకంగా, మన సంస్కృతికి సంబంధించిన గుర్తింపుగా నిలుస్తుంది. “ఖమ్మం” అధికారిక పేరు అయితే, “ఖామ్మేట్” మన బంజారా పెద్దల పలుకుబడిలో నిలిచిన పేరు అని గౌరవంగా గుర్తుచేసుకోవచ్చు. మన చరిత్రను మనమే తెలుసుకోవాలి. మన పెద్దలు ఉపయోగించిన పదాలను, మన భాషను, మన సంస్కృతిని భవిష్యత్ తరాలకు అందించాలి. ఖామ్మేట్ అనేది మన జ్ఞాపకం… ఖామ్మేట్ అనేది మన అనుబంధం… ఖామ్మేట్ అనేది మన బంజారా గర్వం… మన ఖమ్మం బంజారా భవన్కు కూడా “ఖామ్మేట్ – బంజారా భవన్” అనే పేరును గుర్తుగా ఉపయోగించడం ద్వారా మన పెద్దల జ్ఞాపకాలను, మన స్థానిక బంజారా పలుకుబడిని భవిష్యత్ తరాలకు పరిచయం చేయవచ్చు. మన భాషను కాపాడుకుందాం – మన సంస్కృతిని కాపాడుకుందాం – మన చరిత్రను భవిష్యత్ తరాలకు అందిద్దాం.ఖామ్మేట్ – మన బంజారా గర్వం జై బంజారా జై సేవాలాల్ మహారాజ్ వ్యాసకర్త: బస్కీ నాయక్ బానోత్