పొలిటికల్ పవర్ జాతీయ తెలుగుదినపత్రిక అనపర్తి నియోజకవర్గ ప్రతినిధి జూలై 10:
డాక్టర్స్ డే సందర్భంగా అనపర్తిలోని నారాయణ విద్యాసంస్థలో వేడుకలను ఘనంగా నిర్వహించారు. వైద్య వృత్తి గొప్పతనాన్ని విద్యార్థులకు తెలియజేసే ఉద్దేశంతో ప్రత్యేక కార్యక్రమాలు ఏర్పాటు చేశారు. ఈ సందర్భంగా చిన్నారులు డాక్టర్ల వేషధారణలో పాల్గొని తమ అభినయంతో అందరినీ ఆకట్టుకున్నారు.
ఈ సందర్భంగా ప్రిన్సిపాల్ నందకుమార్ మాట్లాడుతూ, మానవాళి ఆరోగ్యాన్ని కాపాడేందుకు అహర్నిశలు శ్రమించే వైద్యులు సమాజానికి అమూల్యమైన సేవలు అందిస్తున్నారని అన్నారు. ప్రాణాలను నిలబెట్టే వైద్యులను గౌరవించడం ప్రతి ఒక్కరి బాధ్యత అని పేర్కొన్నారు. చిన్నప్పటి నుంచే విద్యార్థుల్లో సేవాభావం, మానవత్వం, సమాజం పట్ల బాధ్యత పెంపొందేలా ఇలాంటి కార్యక్రమాలు దోహదపడతాయని వివరించారు.
కార్యక్రమానికి ముఖ్య అతిథిగా ఏజీఎం అలీషా హాజరై విద్యార్థులను అభినందించారు. అనంతరం కో-ఆర్డినేటర్ మాధురి, ప్రిన్సిపాల్ నందకుమార్, వైస్ ప్రిన్సిపాల్ స్వాతి, ఉపాధ్యాయులు, సిబ్బంది కలిసి కార్యక్రమాన్ని విజయవంతంగా నిర్వహించారు. విద్యార్థుల ప్రదర్శనలు, డాక్టర్ల వేషధారణలు అందరి ప్రశంసలు అందుకున్నాయి.